Ayushman Bharat tenzüker küm 1 ajungba sentong agi

September 23, 2019 nü H&FW Minister, S. Pangnyu  Phom-i Holy Cross School lenjem nung Walkathon  tenzüktsüdang agiba noksa angur.

Dimapur, September 23 (TYO): Dimapur nung Ayushman Bharat Pakhwada küm ka ajungba bilemteta mongogo. Pradhan Mantri Jan Arogya Yojana, PMJAY ya centrally sponsored scheme ka lir aser iba ajanga temang anepalubaren nung teyari agütsür.
District Hospital Dimapur nung sentong ka nung o jembidang Health & Family Welfare Minister S Pangnyu Phom-i “PMJAY ya alima nung health cover tulu rongnung ka lir” ta ashi.
India nung temang anema ayubaren jenjang melenshitsü atema inyakba nung nija mozükitem ajaki yariteptsü mepishir, ta paisa ashi.
“Mozükitemi Ayushman Bharat kübok mezüngoktsüpurtem züngoktsü mesüra tim masüba mapa inyaktsü akok. Anungji, item mapa meinyakdaktsütsü atema inyakyim shitak latettsüla. Aibelenertem merenshitsü aser parnok anema FIR dena benoktsü” ta H&FW Minister Pangnyu-isa metetdaktsü.
Asenoki Ayushman Bharat indang osang prokshidi aser beneficiary tem dang iba scheme indang osang tejangja metetdaktsüdi, ta paisa ayongzük.
Iba sentong nung Deputy Chief Medical Officer, Dr. Antoly Swu-i ashiba agi “Nagaland nung iba scheme kübok kilen lakh 2.33 züngoka lir aser tang tashi nung beneficiary 3255-i Rs.4.70 crores jungnüa teyari nguogo.”
Nagaland nung tenüng züluoka alir lakh 2.33 nungi 32% tongogo. Nagaland nungi beneficiary 125-i state adena orr tangalen iba scheme kübok teyari nguogo, ta laisa ashi.
Nagaland nung hospital 63 tashi Ayushman Bharat scheme kübok züngoka lir aser item rongnung public mozüki 60 aser nija mozüki 3 lir.
Dimapur nung beneficiary ajak agi 2,20,165 lir aser tang tashi nung e-cards 30,344 tashi agütsüogo. Dimapur nung iba scheme kübok Rs.1,75,63,680 tashi teyari agiogo.
Dimapur nung Ayushman Bharat scheme kübok empanelled hospital temji- District hospital, Dimapur, CHC Medziphema, CHC Dhansiripar, CHC Niuland, PHC Kuhoboto, Christian Institute of Health Sciences and Research Hospitial/Referral Hospital aser Faith hospital lir.
Tanü küm ka ajungba sentong nung Health & Family Welfare department-i Social Welfare, Urban Development aser Municipal Affairs department tem den külemi walkathon ka ayongzüka agi.
Iba sentong nung Minister S Pangnyu Phom-ia shilem agi aser pai Holy Cross Higher Secondary School lenjem nungi District Hospital Dimapur tashi walkathon tenzüktsü.
Iba sentong agiba sülen District Hospital Dimapur nung health screening aser BIS Drive ka agi.