Ayushmann Khurrana-i train nungsa kentena liasü

Mumbai, April 19 (Agencies): Bollywood actor-singer Ayushmann Khurrana-i ashiba agi, pa college azüngba mapang Delhi nungi Mumbai tashi express train tem nung sen aatsü atema ken tena liasü.
Ayushmann Mongolbar nü Mumbai nung taruba film Meri Pyaari Bindu nung ken ‘Ye Jawaani Teri’ sayaba sentong nung co-star Parineeti Chopra den külemi arua aten.
Iba ken ajanga film nung tongtishilem, Abhi aser Bindu na Chollege azüngba mapangtem indang tentsür.
College azünba mapang nung tetsürtem puatsü mechi nung ken aten maten ta asüngdang dang Ayushmann-i langzüba agi, “Ni college azüngba mapang nung theatre, live shows, street plays amala nung kanga shilem agia liasü anungji tetsür sülen anishitsüba mapang kangabo meliasü.”
“Ni nenok den onoki train tem nung ‘perform’ asüba indanga shiner. College azüngba mapang nung Delhi nungi Mumbai aoba train ‘Pashchim Express’ taser ka liasü. Ni aser medemertem iba train jagi atutsü aser coach ajak nung kentena aotsü. Iba sülen passenger temi sen agütsübatem saruasa liasü. Onoki iba ajanga sen aika aazük aser Goa-i aotsü asoshi sen bendentet, anungji ni train nung kentener ka ta shitettsü,” ta Vicky Donor actor-i ashi.
Ayushmann-i osangbener tsüngdang ‘Haareya’ ken tena press conference tenzük.
Meri Pyaari Bindu ya Yash Raj Films-i produce asü aser May 12 nü sayatsü asoshi renema lir.