Azhar nokdangtsü atema kuli tejangja agütsütsüla: China

Beijing/New Delhi, February 18 (Agencies): Taruba ita China yimtiba nung India aser China na ken o jembitsü lia Hokolbarnü China-i India dang, JeM tongti, Masood Azhar UN-i nokdangtsü atema kuli tejangja agüjang, ta metetdaktsüogo.
February 22, 2017 nü senden nungji Foreign Secretary, S Jaishankar-i India tenüng nung aser China tsütsü nungi Executive Vice Foreign Minister, Zhang Yesui leniba nung teshimtet telok adentsü.
Linük anapronglai regional aser alima onüktem nung ken o lemteptsü, ta Beijing nung Chinese Foreign Ministry otongdar, Geng Shuang-i osangbenertem dang metetdaktsü.
UN-i Masood Azhar nokdangtsü atema India-i inyakba aser Nuclear Suppliers Group (NSG) nung züngsem akumtsü benokba dak sentakba nung Geng-i, “tangatetba balalaji adoker,” ta ashi.
“Linük anati tangatetba balala atema jembitsü aser amalitepa telemtetba tajung agitsü akok,” ta paisa ashi.
US-i Jaish-e-Mohammed (JeM) tongti Azhar ji kiralongrar ka ama nokdangtsü atema UN Security Council 1267 committee nung benokba dak sentakba nung Geng-i, pa anema kuli tejangja lira China-i ibaji pusemtsü, ta ashi.
“Onok tangatetbaji ka dang, onoki kuli tejangja nüngdaker. Kuli tejangja dang lira ibaji agizüktsü akok. Kuli tejangja melira telemtetba ka dangi marutsü,” ta China lenirisa ashi.
Tan ita tetenzüklen United States-i Pathankot amaktsü atema sentong asameyangsang, Masood Azhar ji alima nung kiralongrar ka lir ta sangdongtsü atema UN nung benoka liasü, ajisüaka ibaji China-i nokdang.
Yaküm December ita nung India-ia JEM tongti nokdangtsü atema UN nung benok, ajisüaka China-i nokdanga liasü.
Sorkar ketdangsertem osang ka ajanga ashiba agi, UK aser France linük nati pusema December ita nung US-i UN Sanctions Committee 1267 dang Azhar nokdangtsü atema benoka liasü.
Washington aser New Delhi nati, JeM ya alima nung kiralongrar telok ka lir aser lenirtemji mechioktsüla ta bangjema liasü, ta kasa osang ajanga ashi. Ajisüaka ibaji China linüki nokdang.
UN Sanction Committee-i Azhar ji nokdangra pa indang kiojen sota ayutsü aser Pakistan densema alima linüktemi Azhar bendanglen senzüsembongba nokdangtsü.