Azo-i asür Swuduve tepsetertem aitsür

Kohima, September 07 (TYO): DAN mendenbuba aser NPF Legislature Party lenir, Kuzholuzo Nienu-i, September 2, 2017 anogo nung tai maket aser ochishir nisung, asür Swuduve Nakro tepsetba atema Toishe, Daniel Yimchunger aser Avituo nunger sashia aitsüogo.

Brihostibarnü Azo-i sangdong ka ajanga, “Iba ama mapa ya nisungibo mamangtettsüsa ka lir. Item ama nisung tepsettertemji Naga lokti nung alitsü metemsü,” ta aitsü.

Paisa tim ketdangsertem dang aibelenertem nem tapet temerenshi agütsütsüla ta temepishiba agütsü.

DAN mendenbuba, Azo-i ashiba agi, state yimtiba nunga March 4, 2015 nü atalokba ama tera agi dang matalok, kong taxi anirtem tejashi nung South Police Station nung adenshia aibelenertemji public ket nung agüjang ta takhangba agütsü.

Azo-i state sorkar dang state nung tensa süngjemtsü atema nüngdakba meratem agia inyakdaktsüner, iba den külemi par kibong mesürji, asür Swuduve Nakro kija dang liasü, anungji takoksa angur kibong nem senotsü teyari agüjang, ta temepishiba agütsüogo.