Azo-i Phek Town welcome gate lapoktsüogo

Phek, April 07 (TYO): Taoba Nagaland minister, Kuzholuzo (Azo) Nienu-i Phek Town Welcome gate tanü, Brehostibar nü lapoktsüogo.
“Sentong, teshisadangba, inyakyim aser tasa tasen amshiba ajanga dang taküm nung terenlok alir. Yamaji meinyakra, asen lima nung terenlok malitsü,” ta Azo-i tanü sentong nung metetdaktsü.
Lenir shiai pei nübur taküm jenjang tajungba kümdaktsütsü aser pei shimba constituency nung terenlok bener arutsütsüsa inyaker asü meinyaker ta mapang shia shishidangtsü nungdakba olen ka pai lemsatep.
“Phek district nung lenmang kanga junga yangluba ajanga lenirtemi nangzükba ama asangang nung inyakba kuli sayur,” ta shia, lenmang junga yanglutsü mangdang asangsang nung atalokba atema pelaba olen ka paisa metetdaktsü.
“Contractor-tem; EE, PWD (R&B), Phek Division aser department kübok inyakertemi atazüktsüba mapang nung mapa tembanga lenmang tajungba küma yanglushiba atema parnok dang pelaba metetdaktsür,” ta Azo-i ashi.
Ano, mapang shitak nung nungdakba senotsü agütsütsüba atema India aser Nagaland sorkar naprongla dang pelaba olen ka pai metetdakja liasü.
Tesüiba minister, Vejoi Vero aser tesüiba MLA, Chekhutso natia tanü sentong nung onük jembiba shilem agiba osang jangjaogo.
Abija Khing, EE, PWD (R&B), Phek Division-i tanü sentongji ani aser Phek Area Public Organization (PAPO) nung Tir, Vezhehu Vero-i tepela o jembia liasü.