Azü aser tzü na külemi ayimtsü makok: Ato kilonser Modi

New Delhi, September 26 (Agencies): Tawa kiralongrartemi Uri nung sepai 18 tepsetba sülen Pakistan aser India na tesentaktep tamajungba akumba mapang ka nung linük ana tsüngda Indus Water Treaty tezüngzüktep agiba reprangshitsü atema sorkari tanü senden ka ayonga liasü, iba senden nung jembidang Ato kilonser, Narendra Modi-i, “Azü aser tzü na külemi ayimtsü makok,” ta ashi.

Iba senden nung adenertem rongnung Ato kilonser indang Principal secretary, Nripendra Misra, National Security Adviser, Ajit Doval, foreign secretary S Jaishankar, Water Resources secretary nungera densema liasü.

Iba senden nung, India-i Indus Water Treaty nung aliba ama Pakistan-i azüokba ayongtem-  Indus, Chenab, Jhelum tzü akokba tashi timba agitsü lemtet.

Osang ka ajanga ashiba agi, Indus, Chenab, Jhelum ayongtem tzüji alu atema akokba tashi agi timtiba agitsü, aser iba telemtetba agiba ya ajanga Jammu & Kashmir state kanga ajangzüktsü.

Jammu & Kashmir-i Indus Water Treaty ajanga parnok takoksa anguba indang mapangshia jembia arur.

India-isa Tulbul navigation project tanaben reprangshitsü lemtet, iba project ya 2007 küm anena liasü.

Sept. 18 anepdang kiralongrartemi Uri nung army 18 tepsetba sülen India-i Pakistan kodamesüi kümdaktsütsü atema iba tezüngzüktep reprangshitsü asoshi iba seanden ayong.

1960 küm September ita nung taoba mapang India Ato kilonser, Jawaharlal Nehru aser Pakistan Tir, Ayub Khan na tsüngda agiba tezüngzüktep nung ayong trok- Beas, Ravi, Sutlej, Indus, Chenab aser Jhelum tzüji linük ana tsüngda lemsatepa agitsü bangjema lir.

Iba tezüngzüktep nung India-i anüdoklen aliba ayongtem- Beas, Ravi aser Sutlej azüoktsü. Item ayong ajunga ya Punjab nungi ayimer.

Ano külen Pakistan-i anüolen aliba ayongtem- Indus, Chenab aser Jhelum azüoktsü, item ayong ya Jammu & Kashmir nungi ayimer.

Taoba hopta External affairs Ministry otongdar, Vikas Swarup-i, Indus Waters Treaty benoka inyakba nung India aser Pakistan na tsüngda tangatetba balala lir, ta jembiogo.

Ano külen Jammu & Kashmir deputy chief minister, Nirmal Singh-ia, 1960 küm agiba tezüngzüktep atema Centre sorkari kechi telemtetbatemsa agidir state-i pusemtsü, ta shiogo.