Azü tokshi tenzüker

FNR teloki taküm ajak bendanga agüja yimjung asoshi inyakba ajanga mapang talangka Naga nunger linük tenzüker teloktem tsüngda azü tokshitepa meraratepi yimjung nung aruba ajanga Naga lima tesünep nung aruogo. Ajisüaka, tang anogo ishika tsüngda Dimapur nung NSCN-IM nung tanishir ka par kidang kinungertem den lia khasetba sülen, ano yakonung NSCN-R nung kilonser ka khasettsü merangba osang agi Nagaland tensa tipmedemi kümogo. FNR ajanga yimjung nung alitsü yanglutsüba telongjem nung NSCN telok ajak dena lir, anungji parnok tsüngda azü tokshia rarateptsübaji  madoker. Ajisüaka, tang azü tokshitepa raratep tenzükba ya NSCN-IM o NSCN-R tsüngda süra, parnok asoshi dang masü saka Naga nunger ajak atema tebilemtsü tuluka kümogo. Tang mapangba yabo NSCN teloktem tsüngda rarateptsüba mapang masü saka külemi longjemer India government den Naga yimten tebilemtsü latettsü asoshi jembitsüba mapang lir. Kena tangbo tajung kaji, India government tenüng nung Naga nunger linük tenzükertem den jembisang, R.N.Ravi governor kümer Kohima nung arua lir, anungji senotsü aser nübo endoka Delhi tashi maoyonga Kohima nung linük tenzükertem ajak mashi mapang ka nung ajurutepa jembitettsü koka lir. Atangji, tang tashi India government den langpang ka nung NSCN telok ajak külemi mener mejembitetter. Iba jagi balaka Naga yimten tebilemtsü ya latettsüba ya mapang agir. Ajak Naga nunger aser kasa Naga yimten nüchiso atema jembirtem telok asünungji, tang yabo Kohima nung R.N.Ravi den külemi langpang ka nung mener jembitsü merangtsüba dak alaka akhidang amato NSCN teloktem tsüngda azü tokshiabo merarateptsüla. Azü tokshi raraba agi akoktsü asübo India-iang Naga yimten temeten onük ya alima nung mali küma samatsür lila mesüra Naga nungertemi India koker lila. Iba kasaji azü tokshia raraba agi akoktsü asübo tang ya Naga yimten nüchiso bushir telok ka dang kümer lila. Item tajangshiba mapatem nung tanser, joko tangbo asenoki azü tokshia masü saka tangatetba agi Naga nunger kenbang obang medemtsü merangtsüla. Tang ajungbenaka nisung dena khaseta azü tokshi tenzükba kuli ya nübortemibo memetet, ajisüaka Naga yimten nüchiso bushiba mapa nung pei adianui pei adianu khasettsüsa kecha kuli agia memetentsütsü. Joko asenok ya lia lia yimten nüchiso bushir masü saka rongsen bushir amato dang küma omadagi. Tang aser tarutsü nung Naga nunger asoshi lendongji aji lir. Linük tenzükertem ket nung prangpong lir aser iba prongpongji linük mapa nung masü saka pei rongsen bushiba mesüra pei ajangzüktsü merangba mapa nung amshira, Naga nunger rongnung ‘civil war’ adoktsü. Iba mapangjibo Nagaland agi Nagaland memesük, ashir auer aser rakzükratemer lima ama kümadoktsü. Tanüa Nagaland nungbo Nagaland goverment-i ozüng mamshitetter, kechiyong government aika aser government o government na rarateptsübaji lendong tulu asütsü. Iba lendongji matalokdang, akok tashi azü medokshii Naga yimten tebilemtsü latettsü merangtsüla. R.N.Ravi governor akümba agi telok karibo Naga yimten onük pa denbo mejembinür ta metetdaktsüogo. Ajisüaka, tang India government tenüng nung Naga nunger yimten nüchiso bushir telok den jembitsü atema nisung tasen ka melenra, ano ken o tesüshii oa adoktsü. Naga yimten latettsübo tang ya mapang tajungtiba asütsü. India tenüng nung jembiri ashi ama, Naga nunger nem yimten nüchiso jengjang magütsütsüa akok mesüra Naga nunger lushi ajak yimten ka kübok bener marutsütsüa akok, saka tang tashi nung R.N.Ravi aser Naga nunger linük tenzüker lenirtemi ashiba ama, Naga yimten jenjangji tang dang nungibo temaba aser tajungba asütsü. Yamaji danga latettetra, tang aliba Naga nunger lanurtemibo tenük asüngtsü südi, kechiyong parnokibo Naga yimten nüchiso bushiba tenüng nung Naga nunger meputepba aser akoksaba ya anendaktsüner aser shitakba linük aser nübor tenzükertem kümner.