Azükarutsüba lenmang

Oshi ajak nung olong shia tetezü lir. Aji oda, English oshi nunga olong shia tetezü mesüra tetenzükdak mongjen kaka lir. Iba jagi, Voice of America radio sentong ka nungi English oshi nung olong shiaji koma aser kodang nungi amshi tenzük, iba tetezü indang radio angartem asoshi “Word and its meaning” ta ser yoker. Aji oda, asen Ao oshi nunga asenoki jembiba olong shia ya tetezü kaka lir aser asenoki item tetezüji meteta asen oshi ya jembira, ibaji jangratemtsüka aser iba jagi asenok nem tangatetba kenyongi balaka agütsütsü. Aji oda, asen oshi nunga “Azükaru” ta asüba olong tetezü ya jangratemtsüka aser iba olong tetezü angateta asenoki litetra azükarutsü. Tsüraburtemi ashiba agi, azükaru tetezüji aseni aazükba, anungji aseni mapa tajung inyakba aser Tsüngremi ashiba angaa lira, iba taaji Pai asenok moatsütsü, ibaji angati anguba temoatsü ka masü saka asenoki aazükba temoatsü lir. Aji oda, ano külen asenoki mapa tajung kecha meinyak aser Tsüngremi mulungba ama melitetra mazükmarutsü. Mazükmaru tetezü asenok moatsütsüsa Tsüngrem aser nisung tsüngdang asenoki kecha aazüka maka anungji temoatsü marur. Iba kasaji tanü asen taküm aser kibong nung ataloktsü. Aji oda, aseni inyakba nung azükarutsübaji lenmang ka lir, ibaji asenok mulung ajak agi Kibuba Tsüngremi mulungba ama alitsü aser inyaktsüla. Akhidang, Yihuda chuba Hezekiah mapang pa meketa tsükchir aika liasü. Pa chuba mendeni atuba mapang pa chuba yimli nung tensa mapang mejungi liasü. Par tsüraburtemi süngyanglu külem aser nübortem nem süngyanglu külemdaktsü ta 2 Putipuyang 28 nung shia angur. Aji oda, Hezekaih kodang chuba aküm, paia par tsüraburtemi külemba baal süngyangluji külemtsü koka liasü. Ajisüaka, pai par tsüraburtemi benshiba tai lenmang nungi meyip. Pai par tsüraburtemi menenba Kibuba temeshidak ki ajak meshitet aser yangji yua aliba temenen osettem ajak agiendaktsü. Aji oda, pai Tsüngrem külemdak kitem yanglushi aser pa mulung ajak agi pa külem aser Pa ozüngtem ajak shitak benshia yimsü asü. Ibayongji Tsüngremi pa azükarudaktsü, kechiyong pai pa azükarutsüsa Tsüngremi ashiba anga. Ibaji Tsüngrem nungi Hezekiai aazükba temoatsü liasü. Aji oda, 2 Putipuyang 31: 20-21 nung Hezekia chuba azükaruba indang yamai shia angu, ” Hezekiai Kibuba pa Tsüngrem madang kechi tajung aser shitak aser temulung lemtettsüsa liasü, aji inyak, aser Tsüngrem kidang inyakba mapa nung Tsüngrem ozüng ajak shitak benshia Tsüngrem bushi, ibayongji pa azükaru.” Aji oda, Uzzia chuba yimsüsüba mapanga, kopiga pai Tsüngrem bushi, papigaji Tsüngremi pa azükarudaktsü,” ta 2 Putipuyang 26:5 nung shia angur. Atangji, nisung ajaki azükarua linür, saka kodang yimsüsür lenirtem ajaki Tsüngremi memulungba inyaker aser nübortemia Tsüngrem aküm metsübui alir, iba ama mapang ka nung asenoka azükarua alitsüsa asenoki maazüktetter. Atangji, aseni ngua nisung tamajunger aika kanga azükarua aliba asenoki angur. Idangji, asenokbo kodaser azükaru masür aser parnokbo azükarur ta asenoksasa asenok mulungjang menena bilema alitsüa akok. Ajisüaka, Tsüngremi ashir, shirnoki Pa ozüng benshir parnokji azükarudaktsütsü, saka meshitaki bendenba rongsenji manger sangwa nung ozü ama yimshia aotsü aser maazük ser nung azükarur ama aliba mapangji ken atema dang asütsü. Itemji tangari repranga lia samatsü. Alima nung asenoksasa asenoki aazüka azükaruba nung tepela aser jangratem anguba tetka konga mali. Ibaji Tsüngrem bushia Pai ashiba angaa alirtemi angur. Iba azükaruba senmangji Kibuba nungi arur, anungji ibajibo shingaia raksatsütsü makok. Tsüngrem nungi masüba temoatsütem agi azükarubabo nükenbelemtsüba mapa ka dang asütsü. Item alima temoatsü nung lendong lir. Ajisüaka, Hezekia chuba ama, shirnoki Tsüngremi mulungba inyakba ajanga temoatsü aazüka azükarur, itemjibo shitakba azükarua pelapelaa alitsü.