Azümesen saka chidiyungdi

~ L. Kika Pongener.

Asen Naga nunger ya mapa-bo meinyakner, saka chiyungtsübo tajung dang chiyungnuba kin lir. “Azümesen saka chidiyungdi”. Kidang kibong nungbo kecha maka ser takar-tulur jilu benshia kibong dak malangba subo-solemtsü-bo tajung dang subonur, chi pasa-bo mechiyungnur, shi-ango den-ang chiyungnur aser kecha maka ser o-bo tulu-lu jembir. English nunger shin o nung ashiba, “Work more talkless”… “Mapa tali inyakang saka o-bo ajema jembiang”. Naga nunger atema-bo iba o ya mashi-koshi o ka amai asütsü, kechiaser asenok atema-bo “Talk more workless”… “O-bo tulu-lu jembitsü saka mapa-bo ajema inyaktsü” aji-ang tapetba. Naga nunger-ji yangkü (Pocket) nungbo kecha semoka mali tazüng sernung ‘Miya nunger chanu kati pa langka tajangzük aginudang anemsü agi ‘Saheb’- ‘Mim-Saheb’ ta jara ‘Juka-toa pelaseter’. Ano asen Naga nungeri “Land of Festivals”… “Benjong-bentsü lima”…ta ajaba-ji konang ka amai numadanga jembir, saka shitakba nung angatetdi sura “Mapa meinyaki chidiyungdia longsotepa kazütsü jangraba lima” ta dang meyipzüktsü koka lir. Alemli oboula-otsüla nunger otsü ka nung, ‘Nujong’ lima alir ita sua, küm songtema ‘Kika-Suchi’ benjong-benjong dang lia ki maktepa, yar-tsüngsangtepa, longsotepdang, metsü tsüngküm amadoker alu nung metsüjang-nutsü kecha meyoki suidaktsür, aya-wara jaoka yim toktsür meli-i senshitsüsa akümba otsü ka lir.
Apijemtsü shin o züluri kanga dang tongtipang o ka shia lir, aser iba o yabo asen Naga nunger atema kanga tongtipang o ka asütsü, “Tulur ka ama sayur chiyungtsü makaba dang nungi pei asoshi meranga inyakba tilar ka tajungba” (A.Shin-12:9). Atangji tangar tsüngdang takar-tulur amai lia sayur kidang kibong nungbo kecha makara, aji maaksu tulu ta metettsüla. Ano apijemtsü shin o züluri-sa ashir, “Nisung kati kecha makai yur pei sasa takar akümer; tangar kati rongsen tulu yur pei sasa sensaker küma sayur” (A.Shin-13:7). Shirnoki sensaker sernung tangar dang takar ama lia sayur, parnokji teti sensaka timtema dang alitsü, kechiyong kecha maka sernung takar jilu benshidang nema lur mapa kecha meinyaknutsü, aser mapa meranga meinyakra kodaser akatsü ? Senti-rongsena suang, tachi-tajemtsüa suang, aben-suoshia suang, asenok taküm nung nungdakba kechisarena ajak azümesen mesui mapa meranga nendaka inyakeri dang angutsü, shirnoki mapa meranga inyaker parnok meyong dang asütsü. “Azümesen nisungi kecha mangutsü, saka senti rongsenji tenendakba-pur meyong” (A.Shin-12:27).
Atangji mapa kecha meinyaki azümesena kazüri kecha mangutsü, saka shirnoki mapa nendak-nendaka meranga inyaker senti rongsenji parnok meyong asütsü. Ajisuaka, ano azümesen nisung ka jagi kechisarena merumeroa pei aginutsü dang asütsü, kecha agia tenuk masüngtsü, saka kecha makatsü. “Azümesen taküm-i jenti aginur saka kecha makar; saka tenendakba takümji peria kümdaktsütsü” (A.Shin-13:4). Shirnoki nendak-nendaka meranga inyaker parnokjibo peria kaa-ita kümdaktsütsü ta Tsüngrem o jagi ashir. Naga nunger dang ya chidiyungdi kin ta ajatsü langa lir, kechiaser Naga nungeri shi-ango medeni chi-pasa mechiyungteter, aser khen chiyungdang auso nung shi o ango külemi enoker chiyunger. Oboula-otsüla nungeri khen chiyungdang chi-auso ka nung shi o ango külemi enoker chiyungra Tsüngremi menutsür, aser Tsüngrem dang aakba agi kodanga khen chiyungdang chi-auso nung shi o ango külemi enoker mechiyung. Ano Naga nunger dang ya amajok pela meimba kin ta ajatsü dalang. Amajok pela ta kodang sudir, aji yi agi meseper sasa-pelaba, tsümo-tsüraba, tala-polaba, salep-sariba, japo-jariba, nuktapangda item ajunga-ji dena lir. Atangji amajok pelaba nungji chidiyungdi, rongsen lalushipongba aser mapang amajok nung endokba dena lir.
Laishiba-i ashir, “Shibai amajok pela meimdir iba nisungji sensaker asütsü. Yi aser totzü meimer-ji takar makümtsü” (A.Shin-21:17). Atangji yi-jemer taküm kaji kodanga takar makümtsü teti sensaka dang alitsü. Yi ajemer nisung kati kodanga mapang shitak mamshitsü, kechisarena nung tangar memeneptsü. Yi jemer nisung ka nem mapa kar inyaktsü nungloktsüra, pai aji mapang shitak nung kodanga tem-a meinyaktsütsü. Anungji yi jemer nisung ka dakji shinga-ia mapa kecha nunga tamang mekateter. “Yi pur rongnung aser shi chidiyungdi rongnung teli; kechiyong yi pur aser chidiyungdir-ji sensak tia-i aitsü” (A.Shin-23:20). Aser sensaker taküm aser kibong kaji pei tembar aser adianu-ia dena sempar. “Sensaker-ji pei adianu-ia sempara, pa dang nungi langa pilar alir tembartemi balaka koda tali sempatsü” (A.Shin-19:7). Atangji shirnok ket nung rongsen lir aser takar nisung den tembar yimnur aika alir, saka sensaker den tembar yimner-bo malir. “Rongseni tembar aika akümer, saka sensaker-ji pei tembar nungi pilar (A.Shin-19:4). Ano azümesen taküm kaji teti sensaka timtema dang alitsü. Mapa kecha meinyaki o agi dang jembia kazüba agibo sensak tia-i dang aitsü. “Züsenba ajak nung tajangzük lir, saka tebang agi jembiba agi dangbo anung-apung dang tendaktsür” (A.Shin-14:23). Shirnoki azümesen mesui mapa meranga inyakdir timtema meli-i anisungzüka alitsü, saka tebang agi jembia azümesena kazüra anung-apung dang tendaktsütsü. Azümesen nisung jagi teka agi auso nungi pei achitsüba chiyungtsü-a bener atua tebang nung menemoknutsü. “Azümesener-i pei ket auso nung amuoker, aser aji tanaben pei tebangleni majungketnutsü” (A.Shin-19:24). Azümesen jagi nisung ka ayipjanga nang-nanga mejangdaktsütsü, anungji azümesener-ji sensak tia-i aitsü. “Azümesenbai ayipjanga mejangdaktsür, aser azümesen takümji ayatsü” (A.Shin-19:15). Asenoki tepok sunga chiyunga-jema, kaa-ita, anisungzüka, tangar dak memetaloki linura, azümesen mesui mapa meranga inyakdi.