Azüng-zülu mashir candidate tem nokdangba nung kecha tai mali: SC

New Delhi, December 10 (Agencies): Brihostibar nü Supreme Court (SC) obendang ka ajanga, azüngtsü aser zülutsü mashirtem election nung tokteptsü atema nokdangtsü akok, ta ashi.

Haryana sorkari Panchayat election nung tokteptsüpur atema tazüngba kuli lateta ayutsü (minimum educational qualification) atema telemtetba agibaji Supreme Court-i pusemogo.

Haryana state sorkari election nung tokteptsü atema temsüa alitsü asoshi election nung toktepnertem kidang metsümeshidak alitsüla ta lemtetbajia SC-i pusemogo.

Panchayat election nung tokteptsü atema temsüa alitsü asoshi teburtem class 10 pass, tetsürtem class 8 pass aser Dalit nunger Class 5 pass asütsüla, ta lemtetbaji grassroot level election nung nütsüng timtiba aliba lokti election nung tokteptsü maongka magütsütsü atema lir, ta tetsür kari benokba temepishibaji court-i magizük.

Haryana Panchayati Raj (Amendment) Act, 2015 anema Fatehabad, Hissar aser Jhajjhar yimtitem nungi tetsürtem jagi court dang, state nung aliba yimtsüngtem nung tetsür arishi küm 20 ser temapur shilem 83.06-i panchayat election nung metokteptettsü, kechiyong parnok tazüngba mali, ta ashi.

Tetsürtem jagisa, “State nung aliba yimti aser jila tem nung tetsür shilem 67-ia shilem magitettsü,” ta ashi.