B.Sc. (Agri) kaketshirtem yim 4 nung mungzüka aliuyimba angazüker

Kezoma, October 11 (TYO) : B.Sc. (Agri) kaketshir 57 tashi Kohima district kübok yimtsüng pezü nung lemsar mungdar aser parnoki yimtsüng tia nung alirtemi aluyimba aser parnok libaliro angazüktsü meranger.
Kaketshir telok pezüji Kezoma, Kidima, Kezo Basa aser Sakhabama yimtsüng nung lemsar amunger. Iba sentong ya School of Agricultural Sciences & Rural Development,(SASRD), NU Campus Medziphema aser Nagaland state agriculture department nati tenzükba Rural Agricultural Work Experience Programme (RAWEP) kübok shilem ka lir.
Ita asem sentong ya August nung tenzük aser November 3 tashi agitsü.
SASRD dean M. Aleminla Ao-i ashiba agi, B.Sc (Agri) hons curriculum nung RAWEP ya kanga dang tongtipang shilem ka lir aser iba ya ajanga kaketshirtemi wadang nung teka ia inyakba ajanga tangazükba jenti angur.
RAWEP ajanga Nagaland nung aliba aluyimertem asoshi aluyimba inyakyim tasen bener arutsütsü aser osangtsüsang belenshitsü, ta Prof. Aleminla-isa ashi.
Taoba hopta demonstration day agidang, coordinator RAWEP Dr. K. K. Jha lenisüba kübok SASRD nungi – Dr. Pankaj Neog (Entomology), Dr. S. Banik (Plantpathology), Dr. Lanunola Tzudir (Agronomy), Dr. L.Y. Longchar (Agri extension) aser Jurisandhya Barik Bordoloi (Soil science) nungertem aden.
Agriculture department nungia Vizonyu Liezie, DAO Kohima, Seyievonuo, AO Kohima aser Vimenuo Mere, BTM (Jakhama block), ATMA Kohima nungertem aden.