Babri Masjid ken o hopta 4 atsülanger

New Delhi, January 18 (Agencies): Taoba mapang Muslim nunger tekülem ki Babri Masjid raksatsüba ken o nung party aikati kaket kulitem agütsütsü atema iba ken o atsülangtsü mepishiba nung ajemdaker Hombar nü Supreme Court (SC)-i iba ken o hopta pezü atsülangogo.

Babri mosque raksatsüba ken o nung Bharatiya Janata Party (BJP) nungi lenir taintem anema tai tongloktsüba agientsü atema kaket kuli kar agütsütsü atema temepishiba ka angadangba sülen SC-i iba ken o hopta pezü atsülang.

Iba temepishibaji Central Bureau of Investigation (CBI)-i benoka liasü.

Iba ken o nung onük anaji – ka BJP lenir tain L.K. Advani anema benokba den 1992 küm December 6 nü Ayodhya nung Ram Katha Kunj sabang nung alirtem anema lir. Iba anogo nung Babri mosque raksaja liasü. Ano tanga ken o kaji Muslim nunger tekülem ki Babri Masjid raksatsüba nung shilem agirtem aser iba tesem temeket nung alir ‘karsevaks’ lakh aika anema benokba lir.

CBI-i Advani aser tangar nisung 20 anema Indian Penal Code kübok sections 153A (lokti telemsa tsüngda tsükchitep ajungshiba), 153B (linük telongjem raksatsüsa osang tai agütsüba) aser 505 (rara adoktsüsa mesüra yimjung raksatsüsa sangdong tai agütsüba, olulu prokba) ken o benoka lir.