Babri Masjid-Ram Janmabhoomi ken o Metsüremi 23 nung angadangtsü

New Delhi, Metsüremi 14 (Agencies): Babri Masjid-Ram Janmabhoomi ken o nung tiyongi aita shilem agitsü asoshi tejangja nisung 32-i züluba application tem Supreme Court ajanga tanü (Rasemnü) agientsü aser Metsüremi (March) 23 nung iba ken o angadangtsü anogo lateta ayu.
Rasemnü iba ken o angadangba mapang ‘intervention application’ agütsüba ajak linük nung temaba court-i agientsü. Kasa court ajanga BJP lenir, Subramanian Swamy nem iba ken o nung shilem magitsü asoshi tenokdangba agütsü. Court-i magizükba application ya Shyam Benegal, Aparna Sen, Anil Dharkar aser Teesta Setalvad nunger densema tejangja nisung 32-i zülu aser parnoki iba mangatettep aketba ali tasazük acre 2.77 ya tamangba yimsü atema masü saka ‘secular’ atema amshiang, ta akhanger. Iba ali ya Hindu aser Muslim nungertemi rakteper.
Item ‘intervention application’ tem magizükba sülen iba ken o ya Allahabad High Court nung ken o benokba mapang aliba telok tsüngta dang asütsü, ta SC-i ashi.
2010 küm obendang agütsüba nung Allahabad High Court ajanga mangatettep aliba ali tasazük acre 2.77 ya telok asem – deity Ram Lalla, Sunni Waqf Board aser Nirmohi Akhara – tsüngta kasa-sa sadangtsü.
Court ajangasa iba mangatettep ken o bendangba mapang ken o nung malirtem asoshi kecha meinyaktettsü, ta ashi.
“Onoki shinga danga iba ken o tembangtsü asoshi meshitettsü aser onoki iba ken o metembangtsüa ta meshitettsü. Telok anaprong nungi okatsürtemi nokdaker onok dang parnoki ken o angatettepogo ta shira onoki record asütsü. Iba ken o tembangtsü atema onoki shinga meshiemtettsü. Iba ama ken o nung onoki kotaser iba ama mapa inyaktsü,” ta court-i ashi.
Iba ken o nung Swamy shilem magitsü asoshi SC-i tenokdangba agütsüba sülen pai pa medena jembi aser pa mulungka agi shilem agirba masü saka pa 9Lord Rama) asoba tesem, Ayodhya nung Lord Rama külemtsü asoshi pa indang fundamental right kümzüktsü atema writ petition agütsüba mapang SC-i pa dang iba ken o nung shilem agitsü shia liasü, ta pai ashi.
“Lord Rama asoba tesem nung pa külemtsü atema temeden ya Ayodhya ali raktepba ken o dang nungi temaba lir,” ta Swamy-i court nung ashi.
Ayodhya ken o nung ni shilem agitsü asoshi SC-i mumulungra külemkejatsü atema fundamental right kümzüktsü asoshi ni writ petition agütsüba reprangdangtsüla aser angadangtsüla, ta pai-sa shisem.
Iba telangzüka agüja SC-i pa indang writ petition reprangshitsü asoshi mulung aser totuyuba agütsü, aser kasa ken o ya tetemsü bench ka nung jembitsü, ta ashi.
Document kar aser oshi meyipba maparen ka court nem magütsüba ajanga linük nung temaba court ajanga iba ali acre 2.77 Babri Masjid-Ram Janmabhoomi ali kibur raktepba Ayodhya mangatettep ken o jembitsü atema Metsüremi (March) 14 lateta ayur, ta Tsükali (February) 9 nung renema liasü.
Iba ken o ya judge asemi akümba bench nung Chief Justice of India, Dipak Misra, Justice Ashok Bhushan aser SA Najeeb nungertemi angadang.
Iba ken o nung aliba ali ya ali tasen ka nung mangatettep adokba ken o ama jembitsü, ta Supreme Court ajanga ashir aser iba yongji tangbo putu aika otsü keta aliba ali ya kanga tongtibang ka masü ama kümogo.
2010 küm Allahabad High Court ajanga obendang agütsüba anema nüburtemi benokba ken o ya Tsükalai nung angadangtsü, ta court-i taoba Luchii (December) nung lemteta liasü.
Iba ken o jembitsü asoshi Chiteni (July) 2019 tashi thinentsü atema Sunni Waqf Board aser nütsüng ishiba aliba kin nungi züngsemtemi merangdang, saka court-i magizük.
Taoba küm Yimpoksüi (November) nung Uttar Pradesh Shia Central Waqf Board-i Supreme Court nung iba akhi tejen otsü angatetteptsü asoshi tasüngdangba ka benokdang, kong Hindu nunger tekülem ki ya Ayodhya nung yanglutsü aser Muslim nunger tekülem ki ya Lucknow nung yanglutsü, ta shia liasü.
Allahabad High Court nung judge asem-i akümba bench ajanga 2:1 majority ruling nung, iba ali ya telok asem – Sunni Waqf Biard, Nirmohi Akhara aser deity Ram Lalla – tsüngta kasa sadangtsütsü asoshi obendang agütsü.
Luchii (December) 6, 1992 nung Hindu nunger meyerijang aika adenshia Ayodhya nung aliba Babri mosque ya raksatsü.
Iba sülen mangatettep adokba mapang nisung 2,000 shi taküm samaogo.