Bacteria tapu ka agi khenü nung tekolok atonger

Sydney, July 08, 2016 : Scientist temi kanga dang lendong aketba bacteria ka agi gondha 24 tsüngda nung meimchir tekolok aser spinal cord atonger, ta ngutetogo.
Iba bacteria ya teni agi menemdang memeteti atur.
Shirang balala agi tongdaktsüba, Burkholderia pseudomallei, bacteria yagi melioidosis tashidak mela mela bener arur. Ashiba agi melioidosis tashidak yagi küm nung nisung 89,000 shi taküm samatsür aser iba tashidak ya Australia anüdoklentip aser Asia anülolentip tsütsü anüdoklen kanga bulua adoker.
Mezüngbo iba bacteria yagi koma kara jajar mesüra tekolok o spinal cord atongtsü mapang kobika agir iba indang scientist temi mangateti liasü.
Melioidosis tashidak adokdaktsüba bacteria ya ali aser tzü temenen nung alir, ta US Centres for Disease Control & Prevention nungi metetdaktsü.
“Iba bacteria ya teni tazünglen tua tekolok zü anasa aser spinal cord nung dena aliba onoki nguogo,” ta Griffith University Queensland, Australia nung Professor Ifor Beacham-i ashi.
Parnoki iba ya koyatem dak kanga junga tendang aser iba mapang item bacteria ya tekolokzü aser spinal cord-i mao tsüngda teni nung aliba nerves nung jajar ta ngutet.
Iba tongutetba ya parnoki ‘Immunity & Infection’ kaket nung adoktsüogo.
Asia anülolentip tsütsü anüdoklen nisung noklang nung shilem 50 dak melioidosis putettsü aser Cambodia nungbo noklang nung silem 50 dak tema putettsü akok.
Iba bacteria yamai kara jajaba ya ngua kanga aoksaogo aser ibai tetsübutsüka lir, ta Bond University, Queensland nung Associate Professor Jenny Ekberg-i ashi.