Badhaai Ho film-i sen crore 200 dak tema aazükogo

Yimpoksüi/November 21, 2018 (Agencies): Ayushmann Khurrana-i tongti shilem agiba comedy drama, Badhaai Ho ajanga alima ajunga nung sen crore 200 dak tema azükogo, ta trade analyst Taran Adarsh-i ashi. Iba alizüng tongtetba indang tweet asüba mapang Taran-isa iba film ajanga Aamir Khan indang film Thugs of Hindostan ajatettsü, koba Bollywood film tem rongnung sen timtiba indoka yangluba film ka ta züngshir.
Badhaai Ho film ajanga India nung sen crore 158 aazükogo aser alima ajunga nung sen crore 43 aazüka ajak agi sen crore 201 aatetogo.
Vicky Donor film ajanga box office nung sen aika aazüka tenzükba sülen Ayushmann-i film tem nung kanga takok ngua shilem agia arudar. Pai shilem agiba film tem rongnung Shubh Mangal Savdhan, Bareilly Ki Barfi aser AndhaDhun densema lir.
“#ThugsOfHindostan ya sen timtiba indoka yangluba film asütsü akok saka iba film indang *lifetime biz* #USA + #Canada aser #Australia nung #BadhaaiHo dang nungi tajemba asütsü,” ta Taran-i Rasemnü tweet asü.
“Kü idang acting career nung tajung tamajung aika ajangshiogo. Vicky Donor sülen ni shilem agiba film ana asem ka takok tajung mangu aser iba ajanga ni aika angazükogo. Ajisüaka Dum Laga Ke Haisha sülen maneni takok tajung ngua arudar. Ni kü indang film ajak nungi angazüker,” ta Ayushmann-i tawa PTI den interview ka nung ashi.
Paisa, ” ni nüngtugu kümogo ta meteta lir, saka ni iba dak mamangner. Ni tongmelang süa liner aser film ajak kü indang film mezüngbuba ama shilem aginer,” ta ashi.
Hindustan Times review ajanga iba film nem 3.5 stars agütsüogo.