Badminton asayamong mapang YNP puri angati medical check-up agütsütsü

Dimapur, May 2 (Agencies): Young Naga Professionals (YNP) ya state nung wadang balala nung inyakertemi adenshia akümba telok ka lir. Parnoki DDBA Indoor Stadium nung 2017 May 4 nungi 5 tashi, 1buba Northeast Masters’ (Veteran) Badminton Championship asayaba mapang angati ‘medical check-up’ agütsütsü.
Iba angati medical check-up ya nüburtem nem temang anema alitsü asoshi tesayuba agütsüba den külemi nüngdakba purtemnem angati mozü agütsütsü asoshi ayongzükba lir. Iba medical check-up ya state nung doctor tajungtem rongnung kar den külemi Miss India Elite aser Super Model of the World 2017 nung India tenüng nung shilem agitsü alila Dr Priyadarshini Borah-i temang reprangba nung shilem agitsü.
Young Naga Professionals ya registered club mesüra society ka masü saka lokti meimba nüburtem adenshia akümba lokti ka lir. Iba telok nung kin, küm aser atsü apong ajak meyoktepa lir.
May 5 nü medical check-up agitsü aliba ya lokti ajungtsü mechi nung achaayanga inyakba maparen ka lir. Parnoki mananei iba asayamong mapang chiyongtsü ayokba den külemi traditional stall ka lapoktsü.
YNP puri maneni Naga nunger ajak dang iba asayamong nung arua shilem agiba den külemi Naga nunger chiyongtsü balala jangratema achitsü aser angati medical cheak-up arua agitsü asoshi ayongzük.