Badminton Superseries final nung Japan nungi takok ana angu

Kuala Lumpur, December 13 (Agencies): Badminton World Federation (BWF) World Superseries Final asaya nung Japan nungi asayar ana, Kento Momota aser Nozomi Okuhara nati takok angu.
Dubai, United Arab Emirates (UAE) nung sen million dollar ka alang asayaba asayamung nung arishi küm 21 tain, Momota-i tebur kija asaya nung takok angu aser tetsür kija asaya nung arishi küm 20 tain, Okuhara-i takok angu.
World No. 5 Momota-i asaya tenzüker minute 38 tsüngda nung 21-15, 21-12 agi Denmark nunger Viktor Axelsen madak takok angu. Arishi küm 21 tain, Axelsen-i tan asayamung nung takok monguteta ka pa kanga nema atangtsü lir kechiba süra semi final asaya nung pai anaben tashi world champion, world no 1, China nunger Chen Long madak tan mezüngsüa takok angu.
Tetsür kija asaya nung Okuhara-i 22-20, 21-18 agi China tsür Wang Yihan madak takok angu. Tena tsüngda asaya ya gondha ka ser minute asem agia asayaa liasü.
Lai semi final asaya nung world champion, Spain tsür, Carolina Marin koka liasü.
Momota aser Okuhara na prongla sen dollar 80,000 senpet agizük.
2008 küm nungi Japan-i badminton nung shilem agitsü tenzüker tan mezüng tarensen ana nung külemi takok angur asütsü.
Britain nunger apuani nati ‘World Superseries’ nung otsü tasen yanglu
Dubai World Superseries Final asaya nung Chris aser Gabby Adcock nati tenur aser tetsür meyokteper asayaba nung takok ngua Britain asoshi otsü tasen ka bendenlokogo.
Apuani na ya Britain nungi kinungtsü aser kinungbo sür final tonga asayar mezüngbuba lir. Tenati 21-14, 21-17 agi South Korea nungi Ko Sung-hyun aser Kim Ha-na na madak takok angu.
Chris aser Gabby Adcock na ya world no 7 lir.