Baghdad bomb lendong nung 17 pokset; 50 dak tema yiru

Baghdad, September 27 (Agencies): Iraq yimtiba, Baghdad kübok Shiite Muslim nisungtem kanga lungsoa aliba kiyongtem nung bomb lendong 3 tashi tanü, Mongolbar nü atalokdaktsüba osang ka police-i metetdaktsüogo.

“Tanü lendong nung ishiba agi nisung 17 poksetba aser nisung 50 dak tema yiruba osang tang tashi nung jangjaogo,” ta parnoki osang jangjashitsü.

Peisasa pokseta asütsütsü mulungteter kati pa temang nung alenokba bomb pokdakja Baghdad anüdoklen, al-Jadida kiyong nung lendong atalokdaktsü aser iba lendong nung nisung 9 poksetba aser nisung 30 dak tema yirua liasü.

Ano, Baghdad anülulentip tsütsülen, Bayaa kiyong nunga peisasa pokseta asütsü mulungteter tanga kati pa temang nung alenokba bomb pokdaktsüba sülen nisung 6 poksetba aser nisung 22 tashi yirutsüba osang ka police-i metetdaktsü.

Baghdad anülulentip tsütsülensa, al-Radhwaniya kiyong nunga lenmang tezülen yutsüba bomb ka apokba sülen nisung 2 tashi pokseta liasü.

Tanü mezüngbuba lendong anaji par teloki atalokdaktsü ta Islamic State (IS) kiralongrar teloki tenüng agia metetdaktsü saka tasembuba lendong den sentakba osangbo par teloki memetetdaktsü.

US-i nungtiba Iraq mitkar aser Iran-i nungtiba Shiite sepaitemi par telok anema kanga sashia raratsü tenzükba sülen Sunni Muslim nisungtemi tentetba kiralongrar telok tetsüti, IS teloki Iraq nung sorkari amokbangba tesemtem nung tan amala lendong kanga sashia atalokdaktsütsü tenzüka lir.