Baghdad bomb lendong nung 17 shi asü

Baghdad, September 22 (Agencies): Islamic State (IS) kiralongrar teloki Iraq yimtiba, Baghdad aser Baghdad temeket nung densemba tesemtem nung bomb lendong 4 tashi tanü Mongolbar nü atalokdaktsüba osang jangjaogo ta sorkar ketdangser kati metetdaktsü.
“Tanü atalokba lendong nung ishiba agi nisung 17 asüba aser nisung 42 shi yiruba osang tang tashi nung jangjaogo,” ta police aser mozü ketdangsertemi osang jangjashitsü.
Baghdad anüdoklen, Ameen district nung atalokdaktsüba car gari nung alenoker pokdaktsüba bomb lendong nung ishiba agi nisung 12 tashi pokseta liasü ta parnoki ashi.
Baghdad anüdoklen tsütsülena, Shaab kiyong nung lenmang tezülen yutsüba bomb tesashi ka tanü pokdaktsüba ajanga nübur 2 poksetba aser nisung 7 shi yiruba osang jangjaogo ta police-i metetdaktsü.
Baghdad anülulentip tsütsülen, Latifya nunga nisung 2 poksetba aser al-Mashada kiyong nung mitkar 1 poksetba aser nisung 4 yiruba osanga jangjaogo ta parnokisa shisem.
Iraq mitkartemi par linük anüdoklentip aser anülulentip tsütsü densemba tesemtem tashiyim agi agia aliba IS telok makdoktsü asoshi maparen tenzüka lir saka parnoki tanü tashi takok monguteti aliba osang bushiteta lir.