Baghdad bomb lendong nung 23 pokset, 68 shi yiru

Baghdad, September 17 (Agencies): Iraq yimtiba, Baghdad yimti tiyongtsülen bomb lendong 3 tashi tanü Brehostibar nü atalokba osang jangjaogo ta police-i tanü metetdaktsü.

Tan atalokba lendong nung ishiba agi nisung 23 poksetba aser nisung 68 shi yiruba osang tang tashi nung jangjaogo ta parnoki ashi.

Peisasa pokseta asütsü mulungteter anati pei temang nung alenokba bomb Bab al-Shargi kiyong nung pokdakja lendong atalokdaktsüba ajanga ishiba agi nisung 19 tashi asüba osang jangjaogo.

Iba lendong anaji par teloki inyak ta shia, Islamic State (IS) kiralongrar teloki lendong atalokdaktsüba atema tenüng agia metetdaktsüogo.

Ano, Baghdad tiyongtsülensa, Bab al-Muadham kiyong nunga bomb lendong tesashi ka atalokdaktsüba ajanga nisung 4 tashi poksetba osang jangjaogo.

“Tanü bomb lendong 3 tashi atalokba sülen tang tashi nung nisung 68 tashi yirua tang mozükidang anepalua aliba osang jangjaogo,” ta mozü ketdangser kati ashi.

Iraq sorkari Baghdad nung tesep tenteta lendong kanga sashia atalokdaktsüba IS telok Baghdad yimti nungi makdoktsü tenzüka lir saka IS teloki tanü amala lendong Baghdad aser Baghdad temeket tesemtem nung mapang shia atalokdaktsüba osang bushiteta lir.

Ano külen, tarutsü mapang nung tan atalokba amala lendong matalokdaktsütsü nükjidong nung Iraq Ato Kilonser, Haider al-Abadi-i par mitkartem tali kümdangshia par mapa inyaktsü tetuyuba ka agütsüogo.