Baghdad: Mozükidang mi adok; kinü tanur 12 tashi rongset

Baghdad, August 10 (Agencies): Iraq yimtiba, Baghdad nung tentetba mozüki nung densemba maternity ward nung mi lendong atalokba sülen mapang anojungi asoba kinü tanür 12 tashi tanü, Bodbar nü rongsetba osang ka sorkar ketdangsertemi metetdaktsüogo.
“Baghdad nung tentetba Yarmuk mozükidang densemba maternity ward nung mi lendong atalokba sülen kinü tanur 12 shi aser tetsür 29 tashi taküm kümzüka mozüki tangai anir oa anepaluba osanga jangjaogo,” ta taoba mapang Baghdad nung tentetba health directorate nung director inyakba MP, Hani al-Okabi-ia metetdaktsü.
“Yarmuk mozükidang mi lendong atalokba sülen firefighter aser mozüki ketdangsertemi ghonda 3 shi kanga meranga inyakba sülen ang miji remsepteta liasü. Tan lendong ya light timtem ajanga adokba osanga jangjaogo,” ta pai ashi.
US-i aniba alima teloktep mitkartemi Iraq madak tashiyim agi yimsü asüsang, Saddam Hussein yimsüsütsü menden nungi atsüngdoker küm 13 tashi süiaka, totzü jenti ngutetba Iraq linük nung mozüki aser school peria tenteta maliba den külemi, par nüburtemi light tesangwa aser tajemtsü tzüa peria mongui kanga timatemba osang bushiteta lir.
Iraq Ato Kilonser, Haider al-Abadi-i par linük ochimashi inyakba agientsü asoshi küm 2 dak tema kanga meranga inyakba osang bushiteta lir saka par yimsüsür timbakati pai benokba mapatong anema ajanga pai takok monguteti lir.