Baghdad: Muslim nunger kati Christmas süngdong ka asong

Nineveh , December 22 (Agencies) : Iraq Nineveh province nung Khristanpur reshikangshia amshiba temolung aria bilema, Muslim nunger shishilembar kati Baghdad nung Christmas süngdong talangtiba songtsüogo.
Yassir Saad-i Baghdad nung aliba al-Zawraa amusement park tiyong nung feet 85 talang yangluba Christmas süngdongji songtsü. Iba süngdong Lentenlen feet 33 tashi ayimshir, aser iba süngdong jenjang sen $24,00 shi lir, ta Associated Press (AP) ajanga metetdaktsü.
Iraq nung ISIS teloki Khristanpur reshikangshiba ajanga parnok meyirjang aika Iraq toktsür tesem balala nung atsükoka lir, aser item Khristanpur aria bilemba sayua aser asen külem adianu Khristanpur den onok Muslim nungeria Christmas benjung külemi amongba tamaitsü iba süngdong azüng, ta Saad-i ashi.
Iba ajanga Iraq nungeri aser Mosul nung aliba nüburtemi reshikangshi,timtem amadoktsü imlar, ta Saad-isa shisem.
Iraq sorkari aniba teloki Mosul yimti nung IS kiralongrar tesep tenteta aliba samatsütsü meranga raradar. Mosul aser iba temeket nung aliba yimtitem ya IS kiralongrar teloki 2014 küm parnok kuboki aidtaktsü, aser iba ajanga item tesem nung aliba Khristanpur tesem balalai jenshi.
“Iba süngdong ajanga temeim aser yimjung sayur. Iraq Khristanpur ajak tanaben meyiba arua Iraq nung sünepsünepa alitsü imlar,” ta lar tanurtem iba süngdong anasa noksa agiba mapang, tesayur Saba Ismael-i AP tang ashi.
2003 küm rara metenzüktang Iraq nung Khristanpur 1.5 million liasü saka iba rara ajanga shilem 80 shi pei ki yutsür tesem balalai jenshiba ajanga tangpo Iraq nung Khristanpur 275,000 tang anünga lir, ta May ita nung Catholic fraternal organization Knights of Columbus aser Khristanpur pukuma inyaker Human rights teloki metetdakja lir.
IS teloki Khristanpur reshikangshia tepsetba mapa manendaktsüra mapang tatsüka tsüngda nung Iraq nung Khristanpur ajak samatsü, ta Human Rights telok aser tamangba yimsü asoshi jempir telok aikati shia lir.
Mosul yimti aser Nineveh lenten nung aliba Qaraqosh aser Bartella tesem nungi mitkartemi IS telok aritokaka, item yimtitem nung pei ki bushia Khristanpur meyiba marur.
Parnok ki bushia meyiba marudang, Iraq nung Khristanpurtemi parnok kümzüka ayutsü asoshi meranga asalentong yangludar.
“Khristanpur tanaben meyiba orr akhi ama ISIS den kiyonger süa, parnoki reshikangshia aser Nineveh lenten aser Mosul yimti nungi aritoktsü asü, mesüra alima ajungai, central sorkar aser Kurdish Regional sorkar-i Khristanpur kümzüka ayutsü asoshi kuli tejangja agütsütettsü asü?’ ta Nineveh nung, Head of the foreign relations committee of the Chaldean Syriac Assyrian Popular Council aser Deputy Chairman of the Soraya Charity Organization, Loay Mikhael-i November ita The Christian Post dang asüngdanga liasü.
“Khristanpur kodang pei talitaki meyiba arutsüar memetet, saka Kurdistan nung jenoka aliba Khristanpur asoshi teyimla lir,” ta Erbil nung Chaldean Archbishop, Bashar Warda-i shia liasü.
“Islamic State telok kenü anogo koktettsü, saka kotasür nüburtemi temolung lema tanaben iba tesem nung arua temolung satoka litettsü?” ta Mar Elia Church nung Father Douglas al-Bazi-i CP osangzülur dang ashi.