Baghdad nung bomb pokdaktsü; 52 pokset, 78 shi yirutsü

Iraq yimtiba, Baghdad kübok densemba Sadr City nung bomb lendong tesashi ka atalokdaktsüba sülen nüburtem lendong atalokdak sentepa aliba noksa nung angur. (Baghdad, May 11)

 Baghdad, May 11 (Agencies): Iraq yimtiba, Baghdad kübok Shiite Muslim nunger aliba district ka nung bomb lendong tesashi ka tanü, Bodbar nü ataloktsüba osang ka Iraq police-i metetdaktsüogo.

“Baghdad kübok Sadr City nung atalokba bomb lendong nung ishiba agi nisung 52 poksetba aser nisung 78 dak tema yiruba osang tang tashi nung jangjaogo,” ta parnoki ashi.

Islamic State (IS) kiralongrar teloki tanü lendong atalokdaktsüba atema tenüng agia metetdaktsüogo aser tan lendongji ita ishika tsüngda nung Baghdad nung lendong tesashitiba ataloker lir.

Küm 10 tejaklen anogoshia bomb lendong atalokdaktsüdak, Baghdad nung tensa tajungba akümba osang bushiteta lir saka tangasa Baghdad kübok mitkar aser Shiite nisungtem aliba tesemtem nung tanü amala lendong mapang shia atalokdaktsüba osang bushiteta lir.

Tan Baghdad nung lendong atalokba ajanga Iraq Ato Kilonser, Haider al-Abadi’er yimtenren khureta taoba mapang nungi tesashiba kümdaktsüba osang jangjaogo.

Peisasa pokseta asütsü mulungteter IS züngsem kati pokshiba oset alenokba pickup truck gari ka anir arua kasaji Sadr City nung tentetba shishilembadak pokdakja lendongji ataloktsüba osanga jangjaogo.

Ano külen, US-i aniba alima teloktep mitkartemi par tayimtsü amshia nungitba Iraq mitkartemi IS telok Iraq anülulentip tsütsülen, Anbar province nungi takok ngua makdokba sülen par linük anüdoklentip tsütsülen tentetba tongti yimti, Mosul IS ket nungi tanaben agishitsü mapatong tenzüka lir.

Ajisüaka, tanü Baghdad nung lendong atalokdaktsüba ajanga IS teloki Iraq mitkartemi amokbanga aliba tesemtem nung maneni lendong atalokdaktsütetba kuli tejangja angur.

IS teloki taküm February nunga Sadr City nungsa kasa mapang nung bomb lendong 2 tashi atalokdaktsüba ajanga nisung 70 dak tema tepseta liasü.