Baghdad nung nisung 27 pokset, 63 shi yiru

Baghdad, June 09 (Agencies): Iraq yimtiba, Baghdad nung bomb lendong tesashi ana tashi tanü, Brehostibar atalokba osang ka police-i metetdaktsüogo.

Tanü mezüngbuba bomb-ji Baghdad anüdoklen tentetba shishilembadak apok aser iba lendong nung nübur 15 pokset aser nisung 35 shi yiru.

Ano, Baghdad anüdoklentip tsütsülen tentetba mitkar tesep tulutiba anasa, bus stop ka nung tanabuba bomb-ji pokdaktsü aser iba lendong nunga ishiba agi nisung 12 poksetba aser nisung 28 shi yiruba osang tang tashi nung jangjaogo.

Tanü lendong atalokdaktsüba atema telok shingaia tang tashi nung tenüng agia metetdakja mali saka tawa Baghdad nung atalokdaktsüba lendong ajunga par teloki atalokdaktsü ta Islamic State (IS) kiralongrar teloki tenüng agia metetdaktsüba yong tanü lendongjia par telok mapasa asütsü akok ta police-i temulung malemba olen ka metetdaktsüogo.

Iraq mitkartemi IS telok mita makdoktsü mitkar mapatong Fallujah nung tawa kanga sashia inyakaka, IS teloki Baghdad yimti nung tanen makai lendong kanga sashia atalodaktsüba osang bushiteta lir.

2014 küm January ita nungi tenzüka IS teloki tashiyim agi agiba Fallujah yimti tanaben agishitsü nükjidong nung Iraq mitkartemi hopta ishika tejaklen nungi tenzüka IS telok den tongpang raratsü tenzüka lir.

Ao külen, Iraq mitkartemi Fallujah yimti tanaben agishitsü merangdang parnoki tai maketba nüburtem anema tashiyim mapa meinyaktsü tajungshiba olen ka alima ajunga nung nübur temeten asoshi nokdakba tentet, Human Rights Watch (HRW)-ia metetdaktsüogo.

Iraq mitkar aser IS telok na tsüngda Fallujah nung tongpang raraba ajanga iba yimti nung alir nisung 50,000 dak temai pei talidak metoktsüteti timtem toushi jenti ajurua aliba osang ka United Nations (UN)-ia metetdaktsüogo.