Baghdadi-a Süogo

Kiralongrar telok Islamic State tentetsang aser  tongti, Abu Bakr al-Baghdadi süogo, aser iba ya ajanga Islamic State jenjang tamajungba akümtsüa akok. 2014 küm June ita tatembanglen Muslim nunger ajak atema caliph ji Abu Bakr al-Baghdadi asütsü ta sangdongba den külemi Islam amanger ajak dang pa pusemtsü sangdonga liasü. Baghdadi lenisüba kübok kiralongrar telok Islamic State-i Mosul yimti agiba sülen Khristantem, mamangertem aser Yihuda nunger anema parnoki mapa tamajung jenti inyak, ajisüaka taküm March ita nung “caliphate” chirepba sülen pa jenshia senzüa liasü. Ajioda Honibarnü (October. 26) US special forces-i Syria kübok Idlib yimdak aliba lungki ka nung Baghdadi longbanger lia pai pasasa bomb agi par jabaso asem densema pokseta süogo. 2014 küm pa kanga merenba mapang Baghdadi-i alima tesem ajaklen Muslim nunger lanurtem ayongdena züngsem kümdaktsür Syria aser Iraq sepaitem den raraba den külemi Syria nung tanga telungpur teloktem den-a rara aruogo. Iba dak alia parnoki Islam yimsü nung parnok tangatetba sülen manidakertem aser mamangertem anema mapa jenti inyaka aruogo. Tang IS tongti, Baghdadi süadokaka Islamic State telokbo mesama. 2006 küm US-i  al-Qaeda tongti Abu Musab al-Zarqawi tepsetba ajanga Iraq nung pai aniba al-Qaeda jenjang mejungi aküm; pa asüba sülen northren Iraq nung Sunnis teloki al-Qaeda anema apuso, iba denji külemi Iraq nung US sepai tali yokba ajanga parnoki yimtitem toktsür jenshitsüsa aküm, ajisüaka al-Qaeda meshimeshia mesama. 2011 küm Syria nung civil war aliba mapang nung Baghdadi lenisüba kübok al-Qaeda-i ano kiralongrar telok tuluba aser tesashiba Islamic State tenteta liasü. Tang IS dak atalokba ama taoba mapang al-Qaeda dak-a ataloka liasü. September 11, 2001 anogo nung anüng tom nung kiralongrartemi tayimtsü amshia New York yimti nung aliba World Trade Center aser Pentagon amak aser item lendong nung nisung meyirjang asem shi taküm samatsü. Iba anogo nung atalokba lendong ajanga dang asenoki Osama bin Laden tenüng aser pai aniba al Qaeda telok tenüng meteta liasü. Küm aika sülen America nungertemi Pakistan kübok Abbottabad yimti nung aliba ki ka nung Osama bin Laden atsüka aliba meteta America nunger sepaitemi May 1, 2011 anepdang pa kasetogo ajisüaka pai aniba al-Qaeda mesaba saka telok tuluba ang tentet. US-i Osama bin Laden aser Abu Musab al-Zarqawi na tepsetba sülen tawa Bhagdadi tepseter saka kiralongrabo mesamatsütet. Joko kiralongra anema raratsü atema US dak dang meimlai tashi aliba linüktemi longjemer raratsüla mesüra ano IS dang nungi tamajungba aser tesashiba telok adoktsü.