Baghmara SBI nung link mali anogo 8buba; nuburtem mepelar

Tura, August 23 (Agencies): Connectivity shidak maliba aser infrastructure majungba ajanga Garo Hills nung alirtem kanga kangshia arudar. Maneni South Garo Hills nung local SBI branch ka technical tsütsü mapa shidak meinyakba ajanga anogo ti buba shibanga lir aser iba ajanga nüburtem kanga mepelai lir.
Osang ajanga ashiba agi, Baghmara SBI branch nung link samara hopta ka shiogo, ketdangsertem, police aser nüburtemi iba tebilemtsü tekeraba nung reprangshitsütsü asoshi maneni shiaka tanga tashi nung kecha temelenshi mali.
“Bank lapokabo lir saka link majungba ajanga transaction kecha meinyakteter. Nüburtemi complain aika agütsüogo aser itemji onoki SBI regional headquarter nung agütsüogo. Parnoki nisung kar yoka iba service yanglushitsütsü ta nangzükogo, saka tang tashi nung kecha inyaka mali,” ta superintendent of police, Abraham T Sangma-i ashi.
Idakji aliba nüburtemi ashiba agi, SBI puri parnok timtem sendoka toktsüba ya kanga tebilemtsü tulu ka lir. Parnoki maneni bank nung service tekaraba nung yanglushitsütsü asoshi khangogo.
“SBI nung ketdangsertemi onok sendoka toktsüba ajanga kanga kangshidar. Iba ya Shillong mesera Tura asünungbo parnoki yamai inyakla na? joko hopta ka dak tali transaction kecha mesüteter aser parnok yimya ya angudangbo ita junga atatsü südi,” ta iba jila nung alir shishilembar kati ashi.
Temetettsükaji iba jila ya district headquarter süaka APEX bank dak alaka tanga branch kecha mali, aser jila ajunga nung SBI ATM ana dang lir.
Nuburtemi iba bank jakdang longkak aitsü ta metetdaktsüogo aser kasa mapang nung iba ken o dak sendakba nung telok kati Tura nung tanü AGM ajurutsü.
Ajisüaka SBI ketdangsertemi iba ken o dak sendakba nung tang tashi nung kecha telangzüba agüja mali.