Bahah Aden-i tanaben shilangogo

Aden, August 01 (Agencies): Yemen Ato Kilonser, Khaled Bahah-i Saudi Arabia toktsür par Yemen-i tanaben tanü Honibar nü shilangba osang ka sorkar ketdangser kati metetdaktsüogo.
Tang Saudi kübok Riyadh nung jenoka alisang, Yemen Tir, Abedrabbo Mansour Hadi-i aniba sorkar nung Bahah-i Tatong Tir menden bena lir.
Sorkar mitkartemi sorkar anemba Houthi telok yimti nungi makdokba sülen Bahah-i Yemen anülulentip tsütsü, Aden yimti tanü tonga ao.
Saudi mitkar tayimtsü ka nung Aden tonga aosang, Bahah ya taoba July ita tom nungi tenzüka sorkar mitkartemi Houthi telok makdoktsü maparen tenzükba sülen tanü tashi nung par Yemen-i tanaben shilangba lenirtem rong nung tematiba menden abensang akümer lir.
Saudi-i aniba teloktep Arab mitkartemi yaritsü tenzükba sülen Yemen sorkar mitkartemi Houthi telok anema tongpang takok ngua raratsü tenzükba osang bushitetogo.
Yemen nung sorkar mitkar aser Houthi telok na tsüngda tongpang raraba ajanga tanü tashi nung nisung meyirijang jenti asüba den külemi, nübur million aikati timtem toushi tulu ajurutsü tenzüka lir.