Bahawalpur nung totzü abenba gari apokba lendong nung asür 200 jungogo

Bahawalpur, July 04 (Agencies): Taoba ita Pakistan anüdoklen totzü abenba gari ka apokba lendong ajanga asür nisung 205 jungogo aser parnok ya yiruba zübu ajanga asü, ta sorkar ketdangsertemi ashi.
Karachi aser Lahore sendaktepba lenmang tulutiba nung totzü bena aliba gari ka June 25 nung mekübok. Aser iba gari nungi totzü yimshiba ya anasa aliba yimtsüng nungi nüburtem adenshia bendenba mapang mi adoka arong.
“Totzü abenba gari nung mi adoka arongba lendong ajanga yirua aliba nisung asür densema 205 jungogo,” ta Bahawalpur nung ketdangser, Rao Tasleem-i osangbener dang ashi.
Hombar aonunga iba lendong ajanga yirur alir ka asü aser iba lendong ajanga taküm samar 206 jungogo, ta Bahawalpur nung aliba Victoria Hospital nung doctor, Asim Bukhari-i ashi aser iba asüba osang ya sorkar ketdangser temi mangashi liasü.
Iba gari nung mi adoka apokba mapang asür ya nisung 153 liasü. Iba tesem nung aliba nisung kari ashiba agi, iba lendong nung yirur alir anepalutsü asoshi iba tesem anasa aliba mozüki nung mi agi ronger alir anepaluba mozü peria maliba ajanga asür ya timba aküm. Iba lendong nung yirur aliba nisung ya kar Multan aser kar Lahore-i anir ao.
Iba lendong nung taküm samar mejangjatetba temang 125 bo iba tesem nung remogo. Iba mi ajanga nisungtem ya majitettsüsa ronger liasü.
Sorkari iba lendong bushisüngdangba nung police ketdangser pongu aija lir. Osang ajanga ashiba agi, item police temi iba lendong osang ya miimbanga ayutsü merang.
Moko ajanga iba mi lendong ya adok südi, ta bushisüngdanger temi ashir.
Pakistan nung lenmang majungba, gari junga anepalu masüba aser junga maniba ajanga iba ama lendong aiben ajurur.