New Delhi, September 25 (Agencies): Pune nung amenoka aliba motorcycle aser autorickshaw yanglur Bajaj Auto Ltd-i parnoki tan yanglutetba ‘Qute’gari Asia, Africa, Latin America aser Europe nung aliba linük 16 dak tema nung belenshia ayoktsü tebilemba lir.
Bajaj-i quadricycle ta ajaba ‘Qute’ gari ayoktsü asoshi Supreme court nungi temelaba atadar.
Iba gari nung tetsüng pezü keta lir aser Bajaj-i yangluba water-cooled, DTSi 4-valve engine enokja lir. Iba den külemi totzü litre ka agi kilometre 36 jajatettsü aser ghonda ka nung kilometre 70 kara otettsü, ta company-i metetdaktsüogo.
“Iba gari ya tamshitsü kanga melar, tanishitsü tajung, tepongba aser mokozü kanga ajema, (66 GM/km) adokdaktsür. Nüburtemi gari tepongba, tila, sen talang aser tekara aginer, anungji item ajakji ataloktsütsü asoshi onoki iba gari ya yangluba lir,” ta company sangdong ka ajanga metetdaktsü.
2008 küm Delhi nung Auto Expo sentong ka akaba mapang Bajaj Auto-i US sen 3,000 alang indang gari tila ka yanglutsü tebilemba lemsatepa liasü. Iba gari yanglutsü asoshi Bajaj-i Renault-Nissan den loktep aser 2011 tashi nungbo sayatsü sentong renema ayu. Aji oda süaka parnok tsüngda gari jenjang aser design dak sentakba nung magatettep adokba ajanga gari yanglutsü menua aküm, ta Press Trust of India-i September 25, 2012 nü metetdakja liasü.
Renault-Nissan-i iba gari atema US sen 2,500 atakteta yunü saka Bajaj-i iba dangji teküpokba kümdaktsünüa liasü.
Iba sülen Renault-Nissan, iba project nungi anenadok.
Taoba mapang RE60 ta ajaba, iba autorickshaw nung tetsüng asem melena pezü tenja lir aser 200-cc petrol engine ji tesülen enokja lir. Iba gari yanglutsü tenzükdang Bajaj-i sen crore 550 enoka liasü aser ibaji ajanga ita shia iba gari 5,000 yanglutsü amentetogo.

You must be logged in to post a comment Login