Bajaj-i Quadricycle ‘Qute’ gari saya

Lucknow, Rongchii/April 05 (Agencies): Tetsüng asem aketba gari yangluba nüngtugu company, Bajaj Auto-i Uttar Pradesh nung tang mezüng tetzüng pezü aketba (Quadricycle) gari ‘Qute’ sayaogo.
Uttar Pradesh sorkari ‘Quadricycle’ agizükba sülen iba gari saya. Linük nung Kerala, Odisha, Rajasthan aser Gujarat state tem nungbo item gari sayaogo. Europe nungbo iba ama gari adoker küm 30 shi aoer saka India nungbo tang mezüng March 21 nü Bajaj Auto-i Kerala nung saya aser kasa ita nung parnoki Qute gari 124 ayok.
Gari tasen ya ajanga state kübok yimtitem nung transport service agütsütsü. Quadricycle ya tetsüng pezü aketba gari lir aser iba gari ya totzü kanga marongtsü, mopung memenentsü aser yimtitem nung gari tila asübayong ayongayonga kanga keraa senzütsü atema lir.
General Manager, Intracity Business Unit, Bajaj Auto Ltd, Rajiv Verma-i, “Uttar Pradesh nung Qute gari sayaba atema onok pelar. State nung transportation service tajung agütsüba dak alia iba ya ajanga state nung aikati mapa angutsü,” ta metetdaktsü.
“Küm aika Bajaj Intracity garitem ya India nung tongtibang lir, aser tang Qute gari adokba ajanga eco-friendly ajungkettsütsü aser yimti nung three-wheelers aser gari tem tsüngda keraa senzütettsü,” ta paisa ashi.
Intra-city business Bajaj Auto tongti, Prashant R Ahir-i, “Yimtitem nung nütsüng tali renlokba ajanga traffic tebilemtsü aser mopung menenba tebilemtsü atema Qute ya lenmang tajung ka asütsü,” ta metetdaktsü.
“Petrol aser CNG variant naprong Qute ya tozük tepungba 216 cc 4-valve water-cooled DTSi engine lir aser closed loop fuel injection system densema lir, koba ajanga petrol litre kati kilometer 35 tashi senzütettsü aser CNG kg kati kilometer 43 senzütettsü,” ta paisa ashi.
“Qute gari maintenance nung sen kanga ajema indoktsü, aser ibaji ajanga anogoshia sademsadema senzütettsü. Iba gari anitsü kanga melar, kechiyong gari nung dashboard nung gear keta lir,” ta Ahir-i ashi.
“Onoki Aurangabad nung aliba manufacturing facility nung küm shia iba gari 60,000 yanglutsü capacity amenoka lir. Onoki Asia, Africa, Latin America aser Europe nung linük 30 dak tema dangi iba gari yokogo aser telangzüba tajung nguogo. Uttar Pradesh nunga telangzüba tajung angutsü imlar,” ta paisa shisem.
Qute gari ya UP nung ex-showroom nung sen 2,66,256 (petrol version) lir.