‘Bajirao Mastani’ film-i sen crore 100 aatetogo

December 22, 2015: Film yanglur Sanjay Leela Bhansali-i yangluba aser Ranveer Singh, Deepika Padukone o Priyanka Chopra nungeri tongti shilem agiba “Bajirao Mastani” film ajanga alima ajak nungi aatetba zünga sen crore 100 tashi aatetogo.

Iba film ya Maratha nunger rara nung mongin, Peshwa Bajirao I indang otsü lir. Film nung Ranveer-i Peshwa Bajirao I, Deepika-i Mastani aser Priyanka-i Kashibai nunger ama shilem agia lir. Iba film ya December 18 nü Shah Rukh Khan-i shilem agiba film, “Dilwale” den külemi saya liasü.

Iba film yagi Deobar aonung tashi nung, India nung sen crore 60.80 aser bendang linük nungi sen crore 30 ta, ajak agi sen crore .90.80 aateter liasü. Iba den külemi India nung Hombarnü sen crore 10.25 aatetba ajanga ajak senteper tang tashi nung sen crore 101.05 aateta lir, ta sangdong ka ajanga metetdaktsü.

Ano tajung kaji tesüiba Hombarnü “Bajirao Mastani” film ajanga Rohit Shetty-i direct asüba “Dilwale” film dang sen timba aateta liasü.

“Dilwale” film nung Kajol, Varun Dhawan aser Kriti Sanon nungeria tongti shilem agia lir aser iba film ya ajanga Hombarnü sen crore 10.09 aateta liasü. Tang tashi nung iba film yagi India kija nung sen crore 75.18 aateta lir, ta trade analyst Taran Adarsh-i ashi.

“Hombarnü #BajiraoMastani film-i #Dilwale film dang timba aateta liasü anungji tan hopta item film ana yagi koma aatetdir ta kanga yongyaseta atar,” ta Adarsh-i twitter ajanga Mongulbarnü lemsatep.