Balaka Süang

Saka Danieli pei mulung chubar chiyongtsü tajung mesüra pai yi ajemba agi pa sasa memenentsü ta mulungtet.
Daniel 1:8.

Tsüngremi shibai na aja aser Pa Tanela agi süngdaktsü, pai na ajanga mapa tulu inyaktsü akok ta nai amanger asü? Tsüngremi na ajaba aser mapang aser na alidak tetsüngdaji nai atongtepdangogo ma? Alima nung tatalokbatemi Tsüngrem aoksadaktsütsü makok. Nükjitong ka asoshi na kong lir idakji pai tejangja metetta lidaktsür.
Danieli pa mapang nung tatitangbai Kibuba den tesendaktep nung timtem magütsüdaktsü. Tsüngrem tsüngdang pa taküm tagizüktettsü südaktsütsü asoshi mapa ajak nung tashi angatsüla ta pai metetta liasü. Alima tashi taitba chubai agütsüba ozüng hau ta meli-i Tsüngremi pa nungi kechi aginer aji chuba ozüng den memeyoktepdaktsü.
Khristantem shirnoki Tsüngrem yimli asoshi Tsüngremi parnok lenmang balaka amshitsü ta amang parnok tatishitsü agi otsü sünga lir. Esteri nüburtem kümzüktsü asoshi lendong mapang ka nung Tsüngremi Ester chubar obendang yutsü (Ester 4:14). Ejip nung Pharao yarir tashi taitiba asütsü aser Yakob aser par kibong ayawara nungi kümzüktsü asoshi Yosef yutsü (Lipok 41:39,40).
Ne taküm kümzüktsü asoshi nai na meketa aliba mapangtem jagi na anishidaktsür asü? Mesüra nür putu nung na balaka asütsü asoshi Tsüngrem nükjitong aser tanü ne taküm asoshi Pai mulungba jungkai adoktsütsü Tsüngrem dang asüngdangang.