Balakot nung atalokbaji linük nüburtem nem metetdaktsütsüla: Mamata

Kolkata, March 01 (Agencies): Tanü TMC tongti aser West Bengal Chief Minister, Mamata Banerjee-i, yimtenren politics dang nungibo sepaitem taküm tongtibangba, ajisüaka IAF-i Pakistan nung Balakot amakba sülen yangji kechi atalok, ibaji linük nüburtemi metetner, ta ashi.
Foreign media osangtem ajangabo Indian Air Force-i Balakot nung kiralongrar camps nung teraksatsüba kangabo maliasü ta sangdonger, ta shia Mamata-i, “Ochi osang tejangja agutsütsü atema Air Force nem maongka agutsütsüla,” ta ashi.
Kolkata nung aliba State Secretariat nung osangbenertem den jembidang Mamata-i, “Air strikes sülen onok dang kiralongrar 300 tepset, 350 tepset ta metetdaktsü. Ajisüaka New York Times aser Washington Post osangkakettem nungbo nisung shinga metepset ta ni züngshi. Ano foreign media ka ajangabo nisung ka dang yiru ta metetdaktsü,” ta ashi.
“Asenoki iba osangji metettsü temeden lir, linük nüburtemi yangji (Balakot) nung nisung kwi tepsetar metetner. Atangji bomb ji kong tsükdaktsü? Tesem shidak nung tsükdaktsür asü?” ta lai asüngdang.
Mongolbarnü sorkar ketdangsertemi, anepongi IAF-i bomb amshia Balakot (Khyber Pakhtunkhwa province, Pakistan) nung Jaish-e-Mohammed indang training camp tuluba poksatsü, aser iba mapang nungji kiralongrar, training agutsürtem aser senior commanders 350 tepset, ta sangdonga liasü.
Mamata-i, “Senso ajaki linük meimer aser ochi jangjatsüji senso ajak temeden,” ta ashi.
BJP aitsüba olen ka nung lai, kiralongrartemi Pulwama amakba aser Balakot nung IAF air strike ajanga kari yimtenren nung tajangzük agitsü meranger, ta aitsü.