Baleno tasenba Japan-i export asütsü

Kolkata, October 26, (Agencies): Maruti Suzuki India Ltd. (MSIL)-i tan mezüng süa parnok meyong gari tasenba, Baleno sangküm nungi tenzüka Japan-i export asütsü, ta Hombarnü company sangdong ka ajanga metetdaktsü.

“Japan-i export asütsüba gairji India nung sayaba gari kasa tu lir. Ibai onoki yanglutetba gari Japan-i mezüng export asürba lir,” ta company marketing nung chief general manger Sanjeev Handa-i media dang ashi.

Company indang ‘stake’ shilem 56.21 bo Japan nung aliba Suzuki Motor Corporation meyong lir.

“Japan den ano Latin America, Europe, Sri Lanka aser linük aika dangi iba gari export asütsü tebilemba lir,” ta pai ashi.

January 1, 2016 nü nungi tenzüka linük 100 dak temai iba gari export asütsü aser iba mapang Baleno gari 30,000 tashi yoktettsü teimla lir.

Iba gari ya Haryana nung aliba Manesar plant nung yanglu aser Nexa outlets tem nung talitsü angutsü.

Baleno gari ya taoba ita Frankfurt Motor Show nung saya aser petrol atsükba gariji ex-showroom Kolkata jenjang nung sen lakh 523,912 agi ayoker. Iba den külemi diesel gari temji ex-showroom Kolkata jenjang nung sen lakh 644,108 agi ayoker.

“Iba gari nung ‘anti-lock braking system’ keta lir aser model ajak nung ‘dual air-bags’ inokja lir,” ta Handa-i ashi.

MSIL indang kanga yongyatepa ataba ‘compact SUV’ gari March 31, 2016 nü tashi nung sayatsü, ta company nung ketdangsertemi metetdaktsüogo.