Ballot papers mamshitsü: CEC

New Delhi, January 24 (Agencies): Taruba Lok Sabha Elections nung electronic voting machines (EVMs) mamshitsü saka Ballo papers amshitsü atema yimtenren party aikati takhangba agutsüba mapang ka nung tanü Chief Election Commissioner (CEC), Sunil Arora-i, Election Commission-i ballot papers tanaben meyipa mamshitsü, ta metetdaktsüogo.
Telok balala tsüngda aitsütepba ajanga EVMs ya football ka ama amshir, ta paisa ashi.
National Voters Day amongtsü anogo ana nung lia sentong ka nung jembidang CEC Arora-i, “Ni maneni ano khen iba ya jangjajangja metetdaktsür- onoki ballot papers tejen putu dangi meyipa maotsü,” ta metetdaktsü.
Election agiba mapang nung Ballot papers ya tashikartemi tashiyim amshia bener aoer, anungji Election Commission-i iba linük ya ballot papers tejen putu dangi meyipa bener maotsü, ta paisa shisem.
“Tashishiba mesüra temetongshiba lira onoki ajakji agizüktsü. Tangar nem onok manishidaktsütsü. Ajisüaka onoki EVMs maneni amshitsü,” ta pai ashi.
Cyber mongin kati, EVMs ji raksaa amshitettsü akok, ta sangdongba sülen CEC-i iba o ya jembiogo.
US nungi Cyber mongin ka tenüng agi, Syed Shuja-i, 2014 Lok Sabha elections nung EVMs raksaa amshi, aser ibaji mimbangtsü atema Bharatiya Janata Party lenir Gopinath Munde aser journalist Gauri Lankesh na tepset, ta metetdakja liasü.
Iba osang prokba sülen party aikati taruba Lok Sabha elections nung ballot papers amshitsü akhanger.