BAN aser PAC-i aitsür; Naga shishilembartem aochitsü mepishir

Dimapur, Yimpoksüi (November) 14 (TYO): NSCN (IM) züngsemtemi East Dimapur nung aliba pharmacy nung sales girl ka pur aoba aser Naga dokan kibur dang nungi la chioktsü atema sen meshiba inyakyim khukhua aitsür ta Business Association of Nagas (BAN)-i metetdaktsü.
Talisa Naga tsür ka dak yamai mapa inyakba ya nisung ajaki aitsütsüla. Naga nunger shishilembartemi syndicate system, GST aser non-locals-i toktepba khurettem ajanga timtem balala ajurur. Iba ama tensa ka nung ano NPGs-i tashiyim agi sen meshiba ajanga kodaser tiptema shishilembatettsü. Anungji, NPGs-i Naga nunger shishilembartem dang sen memeshitsü maneni mepishir, ta BAN-isa metetdaktsü.
October 31, 2018 nü Naga Council Dimapur kübok PAC ajanga bangzüngtem renemba nung BAN dena lir aser onoki Naga shishilembartem indang temetentem kümzüka ayutsü, ta parnokisa shisem.
State sorkari Naga lanurtem nem mapa magütsüteta Naga entrepreneur tem aser shishilembartemi mapa inyaktsü maongka agütsür. Anungji state sorkari Naga nunger shishilembartem kümzüka ayutsüla, ta BAN-isa ashi.
Nagatsür ka tashiyim agi anir aoertem apuba atema Dimapur police nem tenüngsang agütsür aser benjung mapang arur asünung police kanga dang kümküma aser yaritsü renema lidaktsür, ta parnokisa shisem.
PAC Naga Council Dimapur-ia November 9, 2018 nü NSCN IM-i sen 30,000 yong Naga sales girl ka pur aoba khukhua aitsür ta metetdaktsü.
Naga loktiliba nung tetsürtem kanga akhümtsübur aser parnok kümzüka ayur saka ajaki meteta aliba Naga Political group kati yamai inyakba angudang aoskar, aser iba inyakyim ya tebilemba shitak alirtem ajaki aitsütsüla, ta PAC-i ashi.
State aser tangalen nungi kaketshir teloktemi dokan kiburtem dang nungi sen saruba inyakyim PAC-i meteta lir aser iba mapa anentsü metetdaktsür. Sen sarua senzürtem kar danga pura, parnok ozüng kübok tai tongloktsütsü, ta PAC-isa kümdangtsü metetdaktsü.
Benjung mapang tenzükba ajanga ozüng alema mapa inyakba kanga bulua kümogo aser dokan kiburtem aser Dimapur-i shishii aruba yimdaklirtemi timtem ajurur, anungji Police department-i kanga junga mita anüktsü mepishir, ta PAC-isa ashi.
Kin Hoho 19, Naga women Hoho Dimapur aser tanga teloktem adenba Naga Council Dimapur (NCD) kübok PAC ya tentet, anungji nüngdak adokra aser loktiliba dak sendakba onük kar dang lira police dang mesüra tsünglanglen agüja aliba lennirtem den osang lemsateptsü mepishir, ta PAC-isa metetdaktsü.
Naga Council office Hombar nungi Bodbar tashi lapoker.
Incharge K.Ghokheto Chophy. contact no 7005440147.
Co-Convenor PAC & Vice-President Naga Council Dimapur Vekhosayi Nyekha Convenor PAC
K. Ghokheto Chophy Co- convenor PAC