BAN-i “BAN BUZZ” ayongzüker

Dimapur, November 29 (TYO) : December 1 nungi 14 tashi Business Association of Nagaland (BAN)-i foot bridge, Holy Cross Point, Dimapur nung “BAN BUZZ” ta ser sentong ka ayongzüka agitsü, anungji Naga nunger shishilembar ajak iba sentong nung arua shilem agitsü jaoker, ta Media Cell, BAN sangdong ka nung metetdaktsü.
Tentet ka ama BAN-i taoba küm ana tashi foot bridge, Holy Cross Point tobur jungdakja anepalua arur aser küm anaprong “best decoration of the town” sempet nguogo. Iba nung ajemdaker “BAN Buzz” ya ayongzüker, kechiyong iba yagi decoration mapa nung yaritepba dang masü saka local shishilembartem asoshi tajangzük agütsütsü, ta sangdong nungsa shia lir.
Taküm BAN-i foot bridge tobur jungdaktsüba dang masü saka entrepreneurs nem stall lemzüktsütsü aser iba ajanga parnoki promotion, advertisement mapa inyakba den benjungmung nung shilem agitettsü, ta BAN-isa metetdaktsü.
BAN Buzz atema stall kar dang lir aser itemji sen dalang yong lemzüktsütsü aser BAN züngsemtem nemang mezüng maongka agütsütsü. December 1 nikongtsütsü 6:30 ako nung light decoration indang lighting ceremony agitsü, ta Media Cell-isa sangdong nung shia lir.
Stalls registration aser tanga osangtsüsang metetpelatsü atema 9856062758 ajanga tongteprateptsü akok.