BAN-i Chumukedima aser Purana Bazar tsüngda shishilembartem den senden agi

Dimapur, August 17 (TYO) : BAN-i Chumukedima aser Purana Bazar tsüngda nung Naga Business inyakertem den ajurutepa senden ka agi, ta Media Cell, BAN-i sangdong ka nung metetdaktsü.
Iba sentong nung mendenji Tiatemsu Longchar liasü aser BAN tongti tezülur Dr. Khekugha Muru-i BAN inyakyim indang osang metetdaktsü.
Sentong nungsa BAN tir Thungbemo Murry-i Naga Business kiburtem dang alizüng ayutsü aser Nagaland state rongsenren tsütsü tashi itdaktsütsü atema tayongzükba agütsü.
Iba sentong nung Western Chakesang Hoho tir Vekosai aser Kuda Cold Storage kibur L. Doulo nati o tatsütsü jembi. Doulo ya tesüiba küm 50 tashi business inyaka aruba nisung ka lir aser pai business inyaka arudang ajurushiba kar lemsatep.
Tebilemba lemsatepba mapang Business kiburtemi parnok khuret aser tebilemtsütem lemsatep aser BAN-i item asoshi tekaratiba nung inyaktsü ayongzük.
Iba sentong nungsa BAN Grievances Cell nung züngsem tasen kar shimok aser screening committee-i chichiba Naga Entrepreneur tem nem BAN kulikaket agütsü.
August 2, 2015 nü shishilembar Ashish Saha tepsetba ken o kanga kara bushitetba atema BAN-i Dimapur Police Commissionerate nem tenüngsang agütsür, ta Media Cell sangdong nung shia lir.
Iba amala inyakyim ya Naga nunger sobaliba nung mali anungji iba mapa nung shilem agir nem police-i tatishitsü amshitsüsa temerenshi agütsütsü mepishir, ta BAN-isa metetdaktsü.
Police-i iba ama mapa tajung inyakba ajanga business inyakertem dang masü saka public temulung lemdaktsür aser Dimapur Police Commissionerate-i maneni mapa tajung inyaktsü ayongzüker, ta Media Cell sangdong nungsa shia lir.