Ban-i Geneva nung Yemen yimjung senden tenzüktsüogo

Geneva, December 15 (Agencies): United Nations (UN) Secretary General, Ban Ki-moon-i tenzüktsüba sülen alimai agizükba Yemen sorkar aser sorkar anemba Houthi telok na tsüngda yimjung senden ka tanü Mongolbar nü nungi tenzüka Switzerland kübok Geneva nung amen tenzükogo.
Yemen sorkar aser sorkar anemer na tsüngda tongpang raraba anendakja par telok ana tsüngda tangatettep agia yimjung tezüngzüktep agidaktsütsü nükjidong nung UN-i tan ayongba yimjung senden ya anogo 3 shi agia amentsü akok.
Yemen sorkar aser Houthi telok lenirtemi arok senden amenba jakdang, UN’er Yemen Special Envoy, Ismail Ould Cheikh Ahmed-i telok anaprongla den tamasa jurila senden balala amentsü sentong renema lir.
“Yemen nung tongpang oset bener tongpang rarar ajungai Yemen yimti aser nüburtem aliba tesem ajunga toktsütsü ajungshir,” ta Ban-i tanü senden tenzüktsüba jakdang osangbener den ajurutepdang metetdaktsü.
Tan ayongba Yemen yimjung senden takok ngua mentettsüsa Yemen nung taruba hopta 2 tashi merarateptsü tezüngzüktep agitsü ayongzüker ta pai ashi.
Muslim nunger Shi’ite Houthi teloki yaküm 2014 küm September ita nungi tenzüka Yemen yimtiba, Sana tashiyim agi agiba sülen par teloki tanübo Yemen lushi tuluba ka agia lir.
Saudi Arabia-i aniba teloktep Arab linüktemi anogo 5 atema meraratsü tezüngzüktep agitsü tayongzükba olen ka tawa metetdaktsü saka Iran-i nungita yariba Houthi teloki iba onükji magizükba osang jangjaogo.
“Houthi teloki tashiyim agiba tesemtem toktsüba den külemi, par teloki tashiyim agi pua ayur nisung 6000 chioktsü aser UN Security Council (UNSC)-i taküm April ita agiba telemtetbaren mapa küma inyaktsü nangzükba sülen ang par telok den yimjung senden amentsü asoshi Yemen sorkari lemtetogo,” ta Yemen Foreign Minister, Riyadh Yassin-ia yashi metetdakja liasü.
Ajisüaka, UNSC Resolution 2216 kübok agiba Houthi teloki tashiyim agi agiba tesemtem toktsütsü aser tai maketba nüburtem mamaktsü telemtetbaji Houthi teloki magizüki lir.