BAN-i light junga maruba atema CM & Power minister dangi zülu

Dimapur, August 23 (TYO) : Nagaland nung light junga maruba ajanga business inyakertem aser industry lapoka alirtem kanga timtem aser takoksa ajuru marem tanü Mongolbar nü Business Association of Nagas (BAN) teloki Nagaland Chief minister aser Power minister na dangi mepelaba o den yakta light junga arudaktsütsüla ta takangba ka agütsüogo.
Nagaland nung light aruba tia ya apibo light enoka lir ta ashitsü malang, kechiyong mapa inyaktsüsa light marur, ajisüaka nübortem vote agi shimtetba VIP-temibo item timtemji memeteti alitsü, kechiyong parnok kidangbo light aoa memetettsüsa government sen agi ajak enoka lir ta BAN telokisa metetdaktsü.
Nagaland nung business inyakertemi state government nem tax shitak agütsür saka light-bo junga meyok kangshidaktsür, iba jagi light ajanga amshiba oset ajak raksar aser itemji yanglushidang rongsen, nübo aser mapang ajak endoker ta parnokisa metetdaktsü. Nagaland power department kübok inyakyim aser osettsüset ajak akhidang inyakba aser enokbatem dang lir, iba jagi timtem ajurur ta BAN telokisa ashi.
Nagaland sorkari center sorkar denbo nisung ajak asoshi anogo nung ghonda 24 light peria agütsütsü asoshi tenangzüktepba ken o renema ayu saka light shitak meyoktetba ya center sorkar nungi sen meshitsü asoshi dang renemba ochimashi ken o ka dang asütsü amai bilemer ta BAN telokisa metetdaktsü.
Aji oda, tang tashi transformer aser tanga osettem ajak tejen dang amshir süra, taoba kümtem nung power asoshi endokba sen agi kechi inyak ta BAN telokisa Chief minister o Power minister na dang asüngdanga metetdaktsü.
State sorkari business inyakertem dang nungi tax-bo shitak agir saka light-bo shitak meyoker aser lenmangbo majung ta süra sorkar temeten kong aka ta parnokisa metetdaktsü.
Anungji, yaktasa Nagaland nung light shitak yoktsüla aser lenmanga yaktasa junga yanglutsüla ta BAN telokisa takangba agütsüogo.