Ban-i Syria nung bushisüngdangtsü telok tentettsü onük benoker

Geneva, August 28 (Agencies): Syria nung mim aketba chemical tonpang oset amshiba osang jangjatsü asoshi bushisüngdang telok ka tentettsü atema United Nations (UN) Secretary General, Ban Ki-moon-i yashi Brehostibar nü onük benokogo.

Syria nung chlorine aser iba amala mim aketba chemical tongpang oset amshia tai maketba nüburtem nem lendong bener arutsüba osang jangjatsü asoshi nisung 3 densemba bushisüngdang telok ka tentettsü onük ya Ban-i shiti ka ajanga UN Security Council (UNSC) den benokba osang jangjaogo.

Syria nung mim aketba chemical tongpang oset amshia tai maketba nübur jenti tepseta yirutsürtem jangjatsü asoshi bushisüngdang telok ka tentettsü telemtetba ka UNSC züngsemtemia tan August ita tetenzüklen pangjema agiba osanga angazükogo.

Syria nung tongpang rarartemi chemical tongpang oset mamshitsüla ta United States aser Russia natia taoba mapang, 2013 küm metetdaktsüogo.

Ajisüaka, Syria Tir, Bashar al-Assad-i aniba Syria sorkar aser sorkar anemertemi tashi mangai chlorine aser iba amala mim aketba chemical tongpang oset amshia maneni tongpang raraba osang bushiteta lir.

“Ozü mitkartemi chemical tongpang oset ken danga amshia mali,” ta shia, pai aniba sorkar atsüngdoktsü merangba sorkar anemertemi chemical tongpang amshiba olen ka Assad-ia metetdakja lir.