BAN-i tax saruba inyakyim ka tenzükdaktsünür

Dimapur, September 17 (TYO): Asen state indang ronsenkettsüng jenjang tajungba kümdaktsütsü atema tax saruba maparen tip atemtsüla. Tang ya department balalai check points aika nung tax sarur, ajisüaka GST telatetba nungbo tax karbo sarutsü memelar, ta Business Association of Nagaland (BAN)-i metetdaktsü.
Talisa, tax saruba teimba ka state indang senpong matonger. Khu abenba garitem tesem balala nung anendaktsür kasa khu atema saru balala agütsüdaktsüba dang masü saka ozüng alema inyakertem aser teloktem nem-a tax sarutsü maongka lapoktsür, ta Media Cell, BAN-i metetdaktsü.
Sorkari department mesüra agency ka nem department balala tenüng nung ozüngi melaba tax sarudaktsütsüla. Ibaji dang masü saka, online nung agütsütettsüsa centralized tax collection system ka tenzük nungbo, iba ajanga tax sarutetbaji state sorkar senpong atongtsü. Iba ajanga department balalai tax talila saruba anentsü aser nüngdak maliba teloktemi tax saruba anendaktsütsü, ta BAN-isa metetdaktsü.