Ban Ki-moon-i Pakistan amakba aitsür

United Nations, November 13 (Agencies) : UN Secretary-General Ban Ki-moon-i, Pakistan kübok aliba Balochistan amakdang nisung 52 taküm lalutsüba aitsüdang lendong agütsürtem ozüng kübok merenshitsüla, ta ashi.
UN secretary-general-i iba lendong nung asür kinungertem, Pakistan sorkar aser linük nung aliba nüburtem den asüku lemsatepogo aser yirur alirtema tekaratiba nung taneptsü angutsü imlar, ta UN otongdar ajanga sangdong ka nung ashiba Xinhua news agency osang ajanga metetdaktsü.
“Pakistan nung bangdaktemi memunui item kiralongrartem pua ozüng kübok merenshitsü imlar,” ta Secretary-General-i sangdong nungji shia lir.
Sangdong nungsa ashiba agi, “Pakistan-i kiralongrartem aputsü merangba mapa nung international aser meimchir temeten kübok UN Secretary-General-ia nungitsü.”
Pakistan kübok aliba Balochistan nung Sufi Muslim tekülemba tesem nung taküm bendanga agütsür tapoktsü pokloktsürtemi yashi nikongdang 6:30 ako meta lendong agütsüdang nisung 52 asü aser nisung 100 dak tema yiru, ta osang ajanga metetdaktsü.
Nisung 500 nungi 600 shi tekülem kidang lia atalokba lendong ji Islamic State teloki agütsü ta parnoksasa metetdaktsüogo.