BAN teloki govt dang ochimashi anema nokdaktsü akanger

Dimapur, Sept.29 (TYO) :  Nagaland nung gari totzü nung kerosene meyokteper yoka aliba mapa tamajung ACAUT ajanga putetba sülen tangbo gari totzü ayokdak ajak nung gari totzü tajung angur aser Nagaland tatem tashi oa kerosene shitak ngudagi, iba mapa atema ACAUT dang pelar ta Business Association of Nagas (BAN) teloki metetdaktsüogo.

Tangbo gari nung totzü tajung atsükba ajanga lenmang talangba jajateter aser gari meraksar iba jagi meranga inyaker anguba sen aika kümzüker aser kakteshirtema electric light maliba ajanga mi apur lesson bushia aliba tangbo kerosene atsükba lantern milen nung lesson bushitetter ta BAN telokisa metetdaktsü.

Ajisüaka, Khristan-temi aniba sorkari gari totzü nung kerosene enoker nübortem dang ayokba ochimashi mapa anema kecha meinyaker saka Naga nungertem akoksadaktsütsü asoshi tsümar ishika yarir ta BAN telokisa government aija metetdaktsü.

Gari totzü nung kerosene enoker ayokba mapa anema  shitak inyaktsü asoshi tang Dimapur nung lokti tentettem aika longjemer state government dang CBI nem bushidaktsütsüla ta takangba agüja alibaji state government-i yakta agizüka mapa küma inyaktsüla ta BAN telokisa metetdaktsü.

 Item  lokti tentettemi anogo 15 tsüngda CBI nem iba ochimashi ken o bushisüngdangtsü magütsüra longkak aita National Highwaymokdangtsü telemtetba agia lir aser iba telemtetba nung BAN teloka adener ta parnokisa metetdaktsü.

Nagaland nung ochimashiba mapatem anema raratsü asoshi lokti tentet ajak longjemer tashi itta nokdaktsüla ta BAN telokisa metetdaktsü.