Agartala, January 04 (Agencies): Bangladesh sorkari kanga merang nokdangaka Tripura dena northeast India tesem nung aliba telungpur telok balala Bangladesh nung tesep tenteta lir, ta Tripura Chief Minister Manik Sarkar-i Hombarnü metetdaktsüogo.
Ato Kilonser Sheikh Hasina-i aniba Bangaladesh sorkari telungpur nokdangtsü maparen nung shilem agiba tenüng sanga ashiba mapang Sarkar-i, “Bangladesh security temi sorkari tetuyuba agütsüba ama mapang ajak nung Tripura aser northeast India nung aliba state balala telungpur aser parnok teseptem makdoker,” ta ashi.
“Aji oda süaka Bangladesh litsü nung telungpur tesep ano lir. Tang Bangaladesh nung ano telungpur tesep 16 nungi 19 tashi shi lir. Tang aliba Bangaladesh sorkari mapang ajak nung India nunger telungpur ajak meshi meshia aridoktsü meranger. Bangladesh security temi telungpuri par linük toktsütsüsa inyakyim balala tenzüka inyakdar,” ta Sarkar-i Deobarnü tenzükba Police Week sentong nung security tem den jembiba mapang ashi.
Pai, India nunger telungpurtemi Bangaladesh sepaitem maliba Chittagong tenem aser arrtsü tsütsü maongka agia parnok tesep tenteta lir aser item tesem nung parnok raradang amshiba oset amshitsü tesayuba agütsür, ta ashi.
“Telungpur züngsem nungi anener alir mesüra pua alirtem dang asüngdangyaba sülen parnok tesep Bangaladesh nung aliba otsü ya tejangja meteta aküm,” ta paisa ashi.
You must be logged in to post a comment Login