Bangalore nung Naga nunger ka yirutsü

Bangalore, November 27 (Agencies): Bangalore nung Manipur nungi Tangkhul nunger kaketshir ka November 26, 2017 aonung auer pezüi yirutsü.
Arishi küm 24 tain Sosem Zimik ya Manipur nung Tangkhul Naga kin nungi lir aser pa Mud pipe, Cunningham Road nung mapa inyaker. Yasüng nisung pezü motorbike ana nung mener arur pa dak kotari agi tsünga yirutsü, ta Naga Students Union Bangalore-i metetdaktsü.
Sosem ya Austin Town, Bangalore nung par adianutem den alir. Yasüng 12:30 ako meta pa mapa nungi kidangi meyipa aodang iba lendong atalok aser pa St. Philomena Hospital nung anioka yaridar.
“Nisung pezü indang tebilembaji mobile phone aser sen auyatsü atema liasü” ta Sosem-i osangbener dang ashi.
Iba tatalokba atema Ashok Nagar police station nung FIR ka benokogo aser idakji inspector Shashadar SD-i aibelenertem dak tapet temerenshi agütsütsü ta metetdaktsüogo.
Taoba mapang nunga Northeast India nungi kaketshirtem dak ozüng alema mapa inyakba aiben atalokogo.
Tang tashi tsünglanglen agüja aliba ken o tem tebushidak lir.
August 30, 2017 nü TC Palya nung Manipur kübok Tangkhul kin nungi arishi küm 23 tain Sayao Ngasainwo tasümang angu. Iba dak sendakba nung KR Puram police station nung FIR ka benok.
July 30, 2017 anepdang 12:30 ako meta nisung anai Mao nunger Komu A dak kotari agi tsünga yirutsü. Pa ya restaurant ka nung inyaka liasü aser pa mapa nungi kidangi aodang lendongji ajuru.
2016 nunga kasa tatalokbatem ajurua liasü aser iba mapang Ahor Vashum aser par medemer ka dak nisung anati kotari agi yirutsü.
Naga Students’ Union Bangalore, Nuthipru Nienu-i ashiba agi, Northeast people nungertemi lendong timtem ajurudang Karnataka police department-i kanga dang teyari agütsür, ajisüaka ken o kar ano metembangteti lir.
Takoksa ajururtem nem temeten agütsütsü atema bangdak department temi pei tajungtiba agi mapa inyaktsü ayongzüker, ta Nuthipru-isa shisem.