Bangkok nung bomb agi nisung 27 pokset

Thailand yimtiba Bangkok nung bomb tesashi ka apokba sülen agiba noksa angur. August 17, 2015.

 Bangkok, August 17 (Agencies): Hombar nü Bangkok yimti tiyong nung bomb ka apokba ajanga tasüba jenti atalokogo, ta sorkar sangdong ka ajanga metetdaktsü.

Osang ajanga shiba agi, tang tashi nung nisung tasür ajak agi 27 aser teyirur 78 ta jangjaogo.

Iba den külemi ano kasa tesem nung bomb ana ngusema lir, ta Thailand sorkar atema otongdar Maj. Gen. Weerachon Sukhondhapatipak-i osangbenertem dang ashi. Kabo parnoki bener oa poktokogo, ta paisa shisem.

Weerachon-i, “Iba bomb lendong nung nisung aika yiruogo aser item teyirur rongnung tanga linük nübura kar lir,” ta metetdaktsü.

Iba bomb lendong ya Rajprasong lenmang lenjem nung atalok aser iba tesem ya yimtenren sentong aika akaba tesem lir. Iba tesem ya raliwali senzürtemi kanga sapua semdangba tesem ‘Erawan Shrine’ anasa lir.

Mezüng bomb ji iba shrine kima angu aser tanabubaji iba tesem tezülen angu ta Weerachon-isa ashi.

Tesüiba sorkar anema mapa shia mepetmesü adokba sülen yaküm May ita nung military yimsüsüba arur külen nungi Thailand yimtiba Bangkok ya kanga süngjema liasü.

Aji oda süaka, tawa tanü ka ya tang aliba sorkar, junta-i 2017 küm tashi election magitsü ta ashiba sülen tensa mejungi akümer.

Bangkok nung gari nung bomb alenloker apokba memeteti liasü saka southern Thailand len sorkar anemer Muslim amanger teloki kati iba amala bomb amshitsü tenzükogo.