Bangkok nung India-Pak NSA senden kaogo

New Delhi, December 06 (Agencies): Tanü Deobar nü Thailand yimtiba, Bangkok nung India-Pakistan National Security Advisors (NSA) jenjang nung senden ka miima kaogo, aser iba senden nung security, kiralongraba aser Jammu & Kashmir onük densema onük aika benoka jembiogo.
Taoba hopta France yimtiba Paris nung Ato kilonser, Narendra Modi aser Pakistan Ato kilonser, Nawaz Sharif na ajurutepba mapang iba senden amentsü atema tena tsüngda mulungtepa liasü. Linük anaprong atema Bangkok ji tapet tesem asüba yong iba yimti shima liasü.
Tesülen linük anaprong külem sangdong ka ajanga, iba senden nung NSA ana den linük anaprong nungi Foreign Secretary densema liasü, ta metetdaktsü.
Kasa sangdong ajangasa, “yimjung aser security, kiralongraba, Jammu & Kashmir aser Line of Control nung yimjung densema onük aika jembiogo,” ta ashi.
Iba sendenji ghonda pezü dak tema amen.
Osang ajanga angazükba agi, NSA senden amentsü tebilembaji Narendra Modi-i mezüng benoka liasü, aser iba ya Russia, Ufa nung lenir ana ajurutepba dak sentaka lir.
Osang ajangasa NSA senden ano akatsü, ta metetdaktsüogo.
Ano External Affairs Minister Sushma Swaraj-a Afghan Conference nung adentsü atema Mongolbar nü Pakistan-i aotsü, ajisüaka la tasüngnüsa meyipa arutsü.
Mezüngbo Centre sorkari External affairs Minister of State, V K Singh yoktsü sentong liasü, ajisüaka Paris nung Modi aser Sharif na ajurutepba sülenbo India-i Swaraj yoktsü lemteta liasü.
Taküm küm tetenzüklen NSA jenjang nung senden amentsü sentong liasü saka Pakistan nung taoba Security Advisor Sartaj Aziz aser Kashmiri separatists ajuruteptsü sentong yangluba ajanga mapang tatong nung iba senden thinena liasü.
Tanü NSA senden amenba atema tenüngsang agüja taoba mapang Jammu & Kashmir chief minister, Omar Abdullah-i twitter ajanga, “Paris ji officially ‘courtesy’ senden ta asüba dak alia liasü. India aser Pakistan maneni ken o asentenshir jembir ta angazüka pelar,” ta ashi.