Bangladesh anentsüh nung asür nisung 163 jungogo

Dhaka, June 19 (Agencies): Bangladesh linük nung hopta ka maneni tsünglu tesashi aru tenzüker Deobarnü anentsüh tasen aluba ajanga nisung pongu taküm samaogo aser iba linük nung hopta ka tsüngda anentsü lendong ajanga taküm samar nisung 163 jungogo.
Deobanrü anentsüh tasen aluba mapang Khagrachhari district nung tanur asem aser Moulvibazar nung tetsür ka aser lar jala asü, ta ketdangser ajanga osangbener dang ashi.
Honibar aonung tsünglu tesashiba aruba ajanga Ramgar jila nung tanur ana mejanga aliba takdang anentsüh agi anenbanga tanur anaprong asü, ta Khagrachhari indang Police Superintendent, Ali Ahmed Khan-i ashi.
Iba tanur ana indang tsürabur ya takdang tanga nung mejanga liasü aser tena bo kicha meyiru, ta kasa osang ajangasa ashi.
Moulvibazar Police Superintendent, Mohammad Shahjalal-i osangbener dang ashiba agi, iba tesem nung anentsüh aludang ki jirepba nung arishi küm 40 tain tetsür ka aser lar jala arishi küm 13 tain ka asü.
Iba lendong tasen adalokba ajanga linük nung taoba Mongulbar nungi tenzüka anentsüh lendong nung taküm samar nisung 163 jungogo, aser sorkari taküm iba anentsüh lendong ya lipok otsü nung tamajungtiba, ta shiogo.
Rangamati district nung iba anentsüh lendong tuluba adalok aser Honibarnü-a nisung tasümang ana nguteta iba district nung taküm anentsüh lendong ajanga asür nisung 113 jungogo, ta Rangamati Deputy Commissioner, Manzurul Mannan-i ashi.
Tsünglu maneni aruba ajanga nüburtem asoshi lendong tali agütsür aser iba ajanga nüburtem aika sorkari anenzüktsü asoshi yanglua aliba tesem 17 bushia arur.
“Nisung aika iba anenzükdak tesem doktsür ao saka tanaben meyiba arur, aser nisung aikati loudspeaker amshia tanaben meyiba arutsü ashir,” ta Manna-i ashi.
Tsünglu ya taoba Deobar nungi aru tenzük saka Mongulbar aser Bodhbar nungi tesashiba aru tenzük. Rangamati district nung tsünglu millimetre 343 aruba kuli lir.
Rangamati nung Deobarnü ghonda trok tsüngta tsünglu millimetre 68 aruba Bangladesh Meteorological Department (BMD) ajanga asadangteta lir, ta BMD indang odongtar ajanga osangbener dang ashi.
Ministry of Disaster Management ajanga lendong ajurua aliba nüburtem nem teyari balala agütsüba mapang lir.