Bangladesh: Cyclone Roanu yipru lendong nung 15 asü

Bangladesh anülulentip tsütsü tzüyimkümlen, Chittagong kübok Patenga nung cyclone Roanu yipru mupongi ki o jen raksatsüdak nüburtem sentepa aliba noksa ka yangi angur. (Chittagong, May 21)

Dhaka, May 21 (Agencies):  Cyclone Roanu ta ajaba yipru lendong Bangladesh tzüyimkümlen tanü, Honibar nü kanga sashia aonba sülen tang tashi nung nisung 15 tashi asüba aser nisung 100 dak tema yiruba osang jangjaogo ta Bangladesh Disaster Management & Relief Minister, Mofazzal Hossain Chowdhury-i metetdaktsüogo.
Ano, lendenlen alir nisung 500,000 shi sorkari renemba jenokdak 3,500 shi nung jenokdaktsüba osanga pai metetdaktsü.
“Cyclone Roanu aontsü osang angazükba sülen yipru lendong ataloktsü tesemtem nung alir nisungtem jenokdak balala nung jenokdakja lendong nungi kümzüktsü terenemshiba agia liasü,” ta pai osang jangjashitsü.
“Ghonda nung kilometer 62-88 kara jajatetba yipru mupongji Bangladesh anülulentip tsütsü tzüyimkümlen, Barisal aser Chittagong na nung tanep aontsü tenzük,” ta Bangladesh Meterological Department ketdangser, Omar Faruq-ia metetdaktsü.
Yipru-i tzünglu kanga sashia bener arutsüba ajanga Chittagon kübok Banshkhali tzüyimkümlen tentetba yimtsüng aika tzü agi metsüngba osanga jangjaogo ta Red Cross ketdangser, Ruhul Amin-i ashi.
“Tan yipru mupong den tzünglu kanga sashia aruba ajanga Chittagong kübok Sitakundu nung anentsü lendong ataloka, tetsü ka aser lar tanur ka anensetba aser Chittagong yimti nunga tila tanur tanga ka asüba osang jangjaogo,” ta police ketdangser, Shah Alam-ia metetdaktsü.
Bhola asetkong kübok Tajmunddin jila nung nisung 2 asüba  aser Patuakhali nung arishi küm 50 tain tetsür ka asüba osanga jangjaogo ta pai metetdaktsü.
“Tang tashi nung nisung aliba ki noklang aika jirepba aser nisunga 15 tashi asüba osang jangjaogo. Ajisüaka, tan lendong nung nisung asüba aser yiruba osangji tang dang nungi timba akümtsü akok,” ta Bangladesh’er Disaster Management Department lenisang, Reaz Ahmed-ia metetdaktsüogo.